Tramp AQŞ Üzäk bankı räislegenä Kevin Uorşnı namzät itep kürsätte
Uorşnıñ bu wazıyfağa bilgelänüe öçen AQŞ Senatınıñ raslawı kiräk.
AQŞ ilbaşı Donal'd Tramp comğa könne êlekkege Federal’ rezerv sisteması citäkçese (Fed) Kevin Uorşnı AQŞ Üzäk bankı räislegenä namzät itep kürsätte.
Tramp üzeneñ “Truth Social” platformasında bolay dip belderde:
“Kevinnı min küptännän beläm häm anıñ tarixqa iñ ZUR Fed räisläreneñ berse, bälki dä iñ yaxşısı bularaq kerep qalaçağına şiklänmim. İñ möhime — ul bu wazıyfağa tulısınça turı kilä, häm sezne berqayçan da ömetsezländermäyäçäk.”
Uorş küp yıllar inflyaśiyägä qarşı şäxes bularaq bilgele ide, ämma soñğı waqıtlarda anıñ qaraşları Tramp citäkçelege taläp itkän agressiv prośent stavkaların töşerü yaqlı fikerlär belän turı kilä başladı.
Tramp bu iğ’lannı Fed älege atnada töp prośent stavkasın üzgärtmägännän soñ yasadı.
İlbaşı wazıyfadağı Fed başlığı Djerom Pauêllnı tağın ber tapqır “axmaq” dip atap, anı qatı tänqıyt’läde.
Aylar buyı däwam itkän şäxsi höcümnär investorlar arasında Fed säyäsäteneñ bäysezlege qurqınıç astında digän kiñ taralğan borçularnı köçäytte; bu xäl isä dön’yanıñ iñ zur iq’tisadı öçen inflaśiya qurqınıçı tudıra ala dip belderelä.