İlbaşı Xose Xeri Limadağı Kongress binası yanında çıqqan bäreleşlärdä ber keşeneñ ülüen, distälägän keşeneñ yaralanuın äytte.

Peru däwlät başlığı çärşämbe könne başqaladağı miting waqıtında barlıqqa kilgän bäreleşlärdä ber keşeneñ yaqtı dönyadan kitüen äytte. Citäkçelekkä berniçä kön êlek kilgän Xeri säyäsi êlitalarğa qarşı yarsulı protest çaraların bastıra almadı.

Räsmi zatlarnıñ könnän-kön naçarayuçı cinayät krizisın çişüdäge uñışlızlığı arqasında başlanıp kitkän çaralarda Lima häm qalğan küp kenä şähärdä meñlägän Peru keşese uramnarğa ağıldı.

Soŝial mediada “55 poliŝiya xezmätkäre häm 20 grajdanlı yaralandı” belderüen yasağan ilbaşı Lima üzägendäge Kongress binası yanında küzätelgän bäreleşlärgä qarağan sannarnı tözätte.

Berniçä minuttan soñ däwlät başlığı protestlarda ber keşeneñ ülüen citkerde.

Kümäk protestlar

Könyaq Amerika ile Peruda protest çaraları atnalar buyı däwam itä. Xalıq ışanıçlıları comğa könne êlekke ilbaşı Dina Boluartenı wazıyfadan alu öçen tawış birde. Krizis cawaplığınıñ Boluarteda buluı uylanıla.

Kongress liderı bularaq wazıyfa başqarğan uñçı säyäsätçe bulğan Xeri apreldä uzaçaq ilbaşı saylawına qadär waqıtlıça däwlät başlığı bularaq wazıyfağa kilde.

Çärşämbe könge protestlar yäşlär liderlığındağı cämğıyät, sänğatçe törkemnäre häm êşçe hönärçe berlekläre tarafınnan oyıştırıldı.

 “AFP” xäbärçese beldergänçä tönge sägätlärdä qayber protestçılar Kongress yanındağı iminlek kirtälärennän uzarğa tırışqan. Qayberläre taş ırğıtıp, feyerverk oçırttı. Maxsus iminlek törkeme isä küzdän yäş kiterüçe gaz sipterde.