“Törkiyä hawa kiñlegen bozuğa qarşı qatğıy çaralar kürä, milli iminlegen nığıta”
Bu xaqta Törkiyä Cömhüriyäte ilbaşı Räcäp Täyyip Ärdoğan belderde.
Törkiyä Cömhüriyäte ilbaşı Räcäp Täyyip Ärdoğan Änkaranıñ hawa kiñlege bozularına qarşı kisken çaralar kürüne häm milli iminlekne nığıtunı däwam itüen äytte.
Pänceşämbe könne çığış yasağan Ärdoğan bolay dide: “86 million xalqıbız öçen cawaplılığıbıznı añlap, bez härwaqıt saqlıq belän häm aqıllı fiker yörtep êş itäbez. Hawa kiñlegebezne bozğan ğamällärgä qarşı bik qatğıy totış kürsätkändä, xalqıbıznıñ tınıçlığın häm iminlegen nığıtuçı adımnar yasawnı da däwam itäbez.”
İlbaşı bu belderülären izge Ramazan ayınnan soñ kilgän Uraza bäyräme uñayınnan Törkiyä watandaşlarına videomöräcäğatendä citkerde. Ul bäyrämneñ ilgä, İslam dön’yasına häm böten keşelekkä bäräkät , mullıq, yaxşılıq kiterüen teläde häm Yaqın Könçığıştağı wäzğıyät’kä dä tuqtaldı.
Ärdoğan: “Ğazzädäge qardäşlärebez İzrailneñ utnı tuqtatu qağıydälären bozğan häm gumanitar yärdämnärne totqarlağan höcümnäre astında Uraza bäyrämen qarşı alırğa tırışa. Berençe çiratta Könçığış Qodüs häm Yordannıñ könbatış üzänlege bulu belän bergä Fälästinneñ törle töbäklärendä häm Kön’yaq Livanda basıp alu häm cimerü säyäsäte bar köçenä däwam itä”,-dip äytte.
Ul şulay uq 28 fevral’dä İranğa qarşı başlanğan höcümnärneñ häm İrannıñ öçençe illärgä raketa häm dron belän cawap qaytarularınıñ töbäk kiyerenkelegen tağın da köçäytüen assızıqladı.
“Bu qurqınıç xäl aldında 86 million xalqıbız öçen cawaplılığıbıznı añlıybız , saqlıq belän häm aqıllı fiker yörtep êş itäbez” digän Ärdoğan, Törkiyäneñ hawa kiñlege bozularına qarşı qatğıy çaralar kürüne häm milli iminlekne nığıtunı däwam itüen äytte.
17 ay êlek başlanğan “Terrorsız Törkiyä” iniśiativasına da tuqtalğan Ärdoğan küp sanda möhim problemanı uñışlı xäl itülären belderde.
Ärdoğan: “Süriyäneñ tön’yağındağı mäs’älä kileşü yulı belän çişelgäç iminlek borçılularıbız kimede, Süriyäneñ cir bötenlege saqlanıp qaldı. Maqsatıbız — töbägebezdä tormışqa aşırılırğa tırışılğan qanlı sśenariylarnı isäpkä alıp, bez başlağan bu xäyerle prośessnı uñışlı tämamlaw”,- dip äytte.
Global’ bilgelesezlek artqan çorda Törkiyäneñ uzğan yıl iq’tisadın 3,6 %qa üsterä aluın da bilgeläp ütkän Ärdoğan 2025 yılda Törkiyäneñ OECD illäre arasında iñ tiz üskän öçençe il buluın da iskärtte.