Germaniyä, saqlanu mömkinleklären arttıru öçen, tağın 15 danä “F-35” xärbi oçqıçı alırğa planlaştıra
Berlinnıñ Awrupanıñ kiçegüçe urtaq oçqıç proyektı urınına AQŞ oçqıçlarına östenlek birüe Franśiyä belän mönäsäbätlärne bozarğa mömkin.
Germaniyä AQŞnıñ “Lockheed Martin” şirkätennän tağın 15 “F-35” xärbi oçqıçı satıp alırğa äzerlänä, dip xäbär itte “Der Spiegel” düşämbe könne, Bundestag finans komitetına täqdim itelgän byudjet dokumentlarına tayanıp.
Planlaştırılğan satıp alunıñ bäyäse yaqınça 2,5 milliard yevro (2,9 milliard dollar) dip farazlana. Bu Germaniyäneñ inde zakaz birelgän 35 danä “F-35” oçqıçına östämä bulaçaq. Alar ildäge iske “Tornado” oçqıçların, şul isäptän Germaniyä cirendä saqlana torğan AQŞ atom bombaların taşıy ala torğan model'lärne almaştıru öçen täğäyenlängän.
Saqlanu ministrı Boris Pistorius täqdime Germaniyäneñ xärbi modernizatsiyä yünäleşen tağın da tiränäytä. Bu yünäleş Ukraina suğışınnan soñ saqlanuğa bülenä torğan çığımnarnıñ kisken arttırıluı belän nığıtıldı.
Awrupanıñ kiçekterelgän oçqıç proyektı
Berlin moñarçı östämä satıp alular planın kire qaqtı, ämma räsmilär äytüençä, kiñäytelgän byudjet yaña zakazlar öçen mömkinlek tudırğan. Şulay da, bu adım Fransiyä belän yañadan kiyerenkelek tudıru belän yanıy, çönki ul Awrupanıñ üzeneñ yaña buın “Future Combat Air System” (FCAS) proyektına zıyan kiterergä mömkin.
Ägär täqdim raslansa, östämä “F-35” oçqıçları Germaniyäneñ NATO berektäşläre, bigräk tä, AQŞ belän xärbi xezmättäşlegen nığıta, ämma şul uq waqıtta Amerika saqlanu texnologiyäsenä bäylelekne tağın da arttıra.