Putin häm Modi Yaña Däxlidä küreşte

Rusiyä ilbaşı Vladimir Putin belän Hindstan prem’yer-ministrı Narendra Modi Yaña Däxlidä comğa könne küreşep söyläşte.

Hindstan Rusiyä liderı öçen qızıl kelam cäyde, Modi ileneñ Ukrainadağı tınıçlıq urnaştıru tırışlıqların xuplawın citkerde.

Putin 4 yıldan soñ Hindstanğa yasağan berençe säfärendä Könbatış sankśiyaläre ike ilne maqsat itep alğan çorda Rusiyä qoralların häm diñgez aşa neften iñ zur satıp aluçısı belän säwdäne canlandırunı maqsat itep quya.

Mäskäw citäkçelege distälägän yıllar buyı Hindstannıñ iñ zur qoral belän täêmin itüçese buldı häm säwdäne 2030 yılğa qadär 100 milliard dollarğa citkerü maqsatı belän tağın da küp Hind tovarın importlarğa teläwen belderde.

Rusiyäneñ yaqınça 4 yıl êlek Ukrainağa höcümennän soñ Awrupa illäre Rusiyä ênergiyasenä bulğan bäyleleklären kimetkän sayın Hindstan bu ildän taşlamalı êşkärtelmägän neft satıp alunı arttırıdı läkin bıyıl AQŞ tarifları häm sankśiyaläre basımı astında bu satıp alularnı äzäytte.

“Hindstan tarafsız tügel”

Söyläşü başında Modi Putinğa bolay dide: “Hindstan tarafsız tügel. İlebezneñ poziśiyase bar, ul da bulsa, tınıçlıq urnaştıru. Tınıçlıq öçen quyıluçı här tırışlıqnı xuplıybız häm tınıçlıq öçen başqarıluçı här iniśiativa yanında bez.”

Putin konfliktnıñ çişeleşenä qarağan qızıqsınu häm tırışlıqları öçen Modiğa räxmät belderde.

İke lider annarı Modi oyıştırğan kiçke aş mäclesendä qatnaştı.

Räsmi söyläşülärdän soñ ike tarafnıñ ber törkem kileşü turında açıqlawı kötelä.

Putin comğa könne Yaña Däxli citäkçelegeneñ Mäskäwdän neft alunı tuqtatuı belän bäyle AQŞ basımı qarşında Hindstanğa neft qudırunı özmäyäçäklären äytte.

Modi häm Putinnıñ şulay uq êş köçe häm xärbi bulmağan atom-töş ênergiya kebek mäs’älälärne dä quzğatuları kötelä.

Säfärdä Putin yanında zur delegaśiya bar.