"YPG" terrorçı oyışması Süriyä armiyäseneñ pozitsiyälärenä 25tän artıq dron höcüme yasadı
Süriyä armiyäse belderüençä, terrorçılar Ayn äl-Arab töbägendäge xärbi nıgıtmalarğa FPV törendäge şartlatqıç dornnar belän höcüm itkän.
Süriyä ğaräp xäbär agentlığı (SANA) citkergänçä, Süriyä armiyäse “YPG” terrorçı oyışmasınıñ Xäleb tiräsendäge xärbi pozitsiyälärgä 25tän artıq kamikadze-dron höcüme oyıştırıp, yañartılğan utnı tuqtatu kileşüen bozuı turında belderde.
Armiyäneñ Operativ komandalığı yäkşämbe könne yasağan belderüendä, “YPG” köçläreneñ Ayn äl-Arab töbäge tiräsendäge Süriyä xärbi punktlarına 25tän artıq FPV törendäge şartlatqıç dronnar belän höcüm itüen räsmi räweştä rasladı. Höcümnär näticäsendä armiyäneñ dürt xärbi texnikası yuq itelde.
Belderüdä äytelgänçä, “YPG”, şulay uq, M4 strategik magistralen häm yaqın-tirädäge awıllarnı maqsat itep alğan, näticädä küp sanda tınıç xalıq yaralanğan. Operativ komandalıq xäzerge waqıtta saqlanu köçläreneñ urınnardağı wäzğıyätne bäyäläwen häm cawap qaytaru çaraların küzdän kiçerüen belderde.
"Süriyä armiyäse, tınıç xalıqnıñ häm xärbi punktlarnıñ maqsat itep alınuına cawap birü öçen, operativ mömkinleklären qarıy häm kiräkle çaralar küräçäk," — diyelä belderüdä.
Bu höcümnär Süriyä xökümäte şimbä könne “YPG” belän utnı tuqtatu kileşüen tağın 15 köngä ozaytuınnan soñ ber kön ütkäç başqarılğan. Süriyä xökümäte monnan alda “YPG” belän bulğan dürt könlek kileşüneñ tögällänüen häm rämi zatlarnıñ bu kileşüdän soñ yasalaçaq adımnarnı bäyäläwlären beldergän ide.