Ärdoğan Törkiyäne din irege öçen ürnäk il itep kürsätte

Törkiyä ilbaşı Räcäp Tayyip Ärdoğan Törkiyäneñ här keşe ğibadätlären cirenä citkerä alğan ürnäk il buluın äytte.

Sişämbe könne Änkaradağı İlbaşı idaräse sarayında dini azçılıq wäkilläre belän iftar aşında oçraşqan Ärdoğan Törkiyäneñ törle din cämğiyätläre arasındağı bergä yäşäw tradiśiyäsenä iğtibarnı cälep itte.

Ärdoğan: "Törkiyä – härkem din yağınnan irekle bulğan, ğibadätlären cirenä citkerä alğan häm üzara xörmät xökem sörgän ürnäk il", – dide.

Däwlät başlığı moña qaramastan soñğı yıllarda artqan İslamofobiyäneñ (İslam doşmanlığınıñ) möselmannar öçen genä tügel, bergä yäşäw mädäniyäte öçen dä citdi qurqınıç tudıruın assızıqladı.

"Ayıruça soñğı yıllarda artqan İslam doşmanlığı bezneñ keşelärebezgä häm dä bergä yäşäw mädäniyätenä açıqtan-açıq yanıy", – dide ilbaşı.

Ğibadätxanälärne maqsat itep alğan êkstremist törkemnärne dä gäyeplägän Ärdoğan mondıy ğämällärneñ töp keşelek qimmätlären qaqşatuın belderde.

İlbaşı: "Mäçet, çirkäw, sinagoga dimiçä bombalawçı, ğibadätxanälärne xörmät itmäwçe “DEAŞ” sıman qarañğı törkemnärgä tüzemlegebez yuq", – dide.

Ärdoğan, härtörle inanuğa qarşı bulğan näfrätne kire qağu kiräklegenä basım yasap, İslam doşmanlığı belän ber rättän antisemitizmnı da keşelekkä qarşı başqarıluçı awır cinayätlär dip atadı.

"Härwaqıt äytep kilgänemçä, İslam doşmanlığı keşelek cinayäte bulsa, antisemitizm da şundıy uq cinayät. Ul - aqlanıp häm röxsät itelep bulmıy torğan ber yawızlıq", – dide Törkiyä liderı.