AQŞ häm Ukraina daimi tınıçlıqqa taba adımnar turında söyläşä
Yaqlar äytüençä, alğarış Rusiyäneñ kiyerenkelekne kimetügä häm ülemnärne tuqtatuğa citdi qarawına bäyle.
AQŞ däwlät departamentı beldergänçä, AQŞ maxsus wäkile Stiven Vitkoff häm AQŞ ilbaşı Donal’d Trampnıñ räsmi bulmağan kiñäşçese Djared Kuşner Rusiya belän suğışnı tuqtatu adımnarı turında söyläşü öçen Ukraina räsmi zatları belän ike atna êçendä altınçı tapqır oçraştı.
Ministrlıq konstruktiv dip bäyälägän ike könlek söyläşülärdä Ukraina milli qurqınıçsızlıq häm saqlanu şurası särqatibe Rustem Umerov häm ğomum ştab başlığı Andrey Xnatov qatnaştı.
Yaqlar Ukrainada daimi häm ğadel tınıçlıqqa taba ışanıçlı yul kartasında alğarış täêmin itü turında söyläştelär.
Umerov Ukrainanıñ östenlekle burıçınıñ Ukraina xalqınıñ qurqınıçsızlığın täêmin itüçe häm demokratik kiläçäk öçen totrıqlı nigez buldıruçı çişeleşne garantiya astına alu buluın yañarttı.
Söyläşülärdä şulay uq AQŞnıñ Rusiya räsmiläre belän soñğı söyläşüläreneñ näticäläre häm dürtençe yılına yaqınlaşıp kilüçe konfliktqa çik quyuğa kiterä alırlıq ixtimal adımnar da qaraldı.
İke yaq ta daimi tınıçlıq öçen kiräkle tıyıp toru mömkinleklären qarap çıqtılar, kiläçäktäge qurqınıçsızlıq çaraları öçen yaña qısa turında kileştelär.
Vaşington häm Kiyev çın alğarışnıñ Rusiyäneñ ozın möddätle tınıçlıqqa citdi qarawına bäyle buluına basım yasadı.
Yaqlar söyläşülärne däwam itü öçen şimbä könne qabat oçraşaçaqlar.