Misır üzeneñ zur muzeyın iskitkeç tantana belän açtı

Kahirä küptän kötelgän häm milliard dollarlıq proyekt bulğan Böyek Misır muzeyın şimbä könne açtı. İl firğawen mirasınıñ zurlığın kürsätüçe muzey yärdämendä turizmğa can örergä häm iqtisadın köçäytergä ömetlänä.

Misır xökümäte räise Mostafa Madbuli Kahirädä uzğan matbuğat cıyılışında: “Bu bezneñ xıyallanğan närsä. Barıbız da bu proyektnıñ tormışqa aşuın telädek”,-dide.

Tantanada 39 däwlät häm xökümät başlığı kerüçe 79 delegaśiyä qatnaşa.

Şimbä irtän muzey tiräsendäge yullar yabıldı häm qurqınıçsızlıq çaraları arttırıldı. Binalarğa häm uramnarğa êlengän bannerlar açılış turında xäbär itä.

Açılıştan aldağı tönnärdä piramidalar häm muzeynıñ zur divarları yaqtırtıldı. Bu da şimbä könne bulaçaq tantananıñ aldan xäbärçese ide.

Giza platosına qarawçı ciñelçä awış urında urnaşqan muzey Yaponiyäneñ zur finans häm texnik yärdäme belän tözelde häm yaqınça yartı million kvadrat metr mäydannı alıp tora.

Madbuli: “Bu dönyaküläm simvol qorılmanıñ tözeleşe, tögällänüe häm bügenge xälgä kiterelüe zur külämdä axırğı 7-8 yıl êçendä başqarıldı”,-dide.

Muzeyda 100 meñnän artıq äsär bar häm bolarnıñ yartısı xalıqqa açıq urında kürgäzmägä quyılaçaq. Bu, misırlı wäqalätlelär äytüençä, dönyadağı ber genä tsivilizatsiyägä bağışlanğan iñ zur kollekśiyä.

Muzeyğa kilüçelär kiñ, yaqtı zallarğa, biyek tüşämle häm yänäşädäge çülne çağıldıruçı qom tösendäge taş divarlı alanğa keräçäk.

Töp atriyumnıñ üzägendä 66 yıl buyı Misır belän idarä itkän häm aña altın çorın kiçertkän firğawen Ramzes II neñ 83 tonnalıq häykäle tora.

Muzeynıñ iğtibar cälep itüçe tağın ber büleme isä idännän tüşämgä qadär pıyala belän qaplanğan tere saqlaw laboratoriyäse. Anda Xufu piramidası yanında kümelgän 4500 yıllıq qoyaş köymäseneñ tözekländerelü protsessın küzätergä mömkin.

Tik kürgäzmäneñ bäxässez yoldızı - Tutanxamonnıñ 5 meñnän artıq äyberdän toruçı kollekśiyäse. Alarnıñ kübese täwge tapqır bergä kürsätelä.  

Yäş firğawenneñ altın bitlegen kürgäzmägä quyu turında detallär älegä belderelmäde.

Turizm ömetläre

Misırnıñ turizm tarmağı 2011nçe yıl fetnälärennän terrorçı höcümnärenä qadär bulğan prośesstağı dulqınlanular säbäple axırğı 5 yılda küp tapqırlar tetrände.

Soñğı yıllarda turizmda torğızılu bilgeläre kürenä. 2025nçe yılnıñ berençe 9 ayında 15 million turist Misırğa kilde häm alardan 12,5 milliard dollar kerem alındı.

Misır turizm ministrı Şärif Fätxi yıl axırına qadär tulayım turist sanınıñ 18 millionğa citüe kötelüen belderde.

Ul yaña muzeynıñ här yıl üzenä 5 million ziyärätçe tartuın farazlawların häm xäzerge waqıtta kön sayın 5-6 meñ keşe qabul itülären söyläde.

“Bu sannı köndälek 15 meñgä citkerergä ömetlänäbez”,- dide Fätxi.

Misır turizm federaśiyäseneñ êlekkege citäkçese Älxami äl-Zayat muzeynıñ Giza platosın yañartunı maqsat itep quyuçı tağın da kiñ plannıñ ber öleşe buluın äytte.

“Misır plato östendä tulısınça yaña mädäni häm turistik mäydan buldırdı”,-dide ul häm yänäşädäge aêroport häm piramidalardağı obyektlarnıñ yañartıluın citkerde.

Platoğa iltüçe yullar tözekländerelde, sanlı bilet alu sisteması tanıtıldı häm êlektrlı avtobuslar piramidalarnıñ yanınnan uza.