Süriyä räsmi zatları beldergänçä, Bäşär Äsäd rejimı bärep töşerelgännän soñ berençe bulğan häm yäkşämbe könne ütkärelgän parlament saylawlarında Dimäşq’tä häm ilneñ berniçä zur şähärendä tawış birü waqıtı ozaytılğan.
Süriyä Xalıq Mäclese saylawları yuğarı komitetı räise Möxämmäd äl-Äxmät däwlät mäğ’lümat çaralarına yasağan belderüdä:
“Dimäşq’ häm qayber vilayät’lärneñ zur şähärlärendä tawış birü waqıtı ozaytıldı, ämma Dimäşq’ tiräsendäge awıllarda häm qayber üzäklärdä tawış birü tögällände”,- dip äytte.
Äl-Äxmät süzlärençä, prośess problemasız däwam itä häm süriyälelär Xalıq Mäclese öçen wäkillären saylawda berençe çın täcribälären kürügä ğorurlanalar.
Cirle mäğ’lümat çaraları xäbär itkänçä, ilbaşı Äxmät äş-Şara saylaw prośessin küzätü öçen Dimäşq’täge milli kitapxanädä urnaşqan saylaw üzägenä kilgän.
Süriyä Ğaräp xäbär agentlığı häm däwlät agentlığı “Äl-İhbariya” mäğ’lümatına qarağanda, Xalıq Mäclesendäge 210 urın öçen 1.578 namzät köç sınaşa, alarnıñ 14%ın xatın-qızlar täşkil itä.
Saylaw näticäläreneñ düşämbe yäisä sişämbe könne matbuğat oçraşuında iğ’lan itelüe kötelä.
2024 yıl azağında Äsäd xakimiyättän alınğannan soñ Süriyäneñ yaña küçeş xökümäte säyäsi häm iq’ťisadi reformalarnı gamälgä aşıruğa, ictimağıy berdämlekne nığıtuğa, regional’ häm xalıqara partnyerlar belän xezmättäşlekne kiñäytügä yünälde.
25 yıl diyärlek Süriyäne citäklägän Bäşär Äsäd ütkän dekabr’dä Rusiyägä qaçtı häm 1963 yıldan birle xakimiyättä bulğan Baas partiyäse rejimı tögällände.
Äxmät äş-Şara citäkçelegendäge yaña küçeş xökümäte isä ğıynwar ayında tözelde.
