İzrail İran iminlek räise Ali Laricaninıñ üterelüen däğwa itte
Ämma İran räsmiläre älegä bu xäbärne raslamadı.
İzrail saqlanu ministrı İsraêl’ Kaś sişämbe könne İrannıñ yuğarı däräcäle iminlek wäqälätlese Ali Laricaninıñ hawa höcümendä üterelüen däğwa itte.
Üz ofisınnan yasalğan belderüdä Kaś Laricani belän bergä Besic köçläre komandirı Gulam Rıza Söläymanineñ dä tönge höcümnärdä täêsirsez xälgä kiterelüen alğa sörde.
Kaś: “Min äle genä ğomum ştab başlığınnan yuğarı milli iminlek şurası ğomum särqatibe Laricani häm İrannıñ üzäk basım apparatı Besic başlığı Söläymanineñ kiçä tönge höcümnärdä täêsirsez xälgä kiterelüläre turında mäğlümat aldım”,- dide.
İzrail mediası êlegräk Laricaninıñ İran yuğarı milli iminlek şurası ğomum särqatibe bularaq, İzrail tarafınnan başqarılğan tönge höcümnärdä nişat itep alınuın xäbär itkän ide.
İran räsmilärennän bu däğwağa qağılışlı älegä cawap bulmadı.
Läkin İzrail däğwasınnan soñ İran däwlät mediası Laricaninıqı dip belderelgän quldan yazılğan yazma bastırdı.
Laricaninıñ “X” akkauntındağı soñğı yazması 17 mart sişämbe könne 09:40 säğättä urnaştırılğan. Ul İran diñgez flotında hälaq bulğannarnıñ cenaza cıyını uñayınnan iskä alu öçen quldan yazılğan yazma.
Ägär dä üleme raslansa, Laricani suğışnıñ berençe könendä hälaq bulğan dini lider Ali Xämänäidän soñ üterelgän iñ yuğarı däräcädäge İran wäqälätlese bulaçaq.
Êlekkege atom-töş söyläşüçese häm Xämänäineñ yaqın berlektäşe Laricani comğa könne Tähranda Qodüs köne çaralarında kürende.
Şul uq könne soñraq AQŞ, aralarında Laricani da bulğan häm İran inqilab saqçıları belän bäyläneşle 10 keşelek isemlek qısalarında, yuğarı däräcäle İran xärbi häm küzläw wäqälätleläre turında mäğlümat birüçelärgä 10 million dollarğa qadär büläk täqdim itte.