Törkiyä Cömhüriyäte Däwlät başlığı Räcäp Tayyip Ärdoğan belän AQŞ İlbaşı Donald Tramp ikeyaqlı mönäsäbätlär belän regional häm global mäs’älälärgä tuqtalıp uzılğan telefon söyläşüen ütkärde. Söyläşü turında Törkiyä İlbaşı idaräseneñ Êlemtä räislege belderü yasadı.

İlbaşı Ärdoğan Trampqa Törkiyäneñ Süriyädäge täräqqiyätlärne “yaqınnan” küzätep baruın, Süriyäneñ berlege, berdämlege häm cir bötenlegeneñ Änkara öçen “möhim” buluın citkerde.

Liderlar “DEAŞ” terror oyışmasına qarşı köräş häm Süriyädäge törmälärdä totılğan “DEAŞ” äğzaläreneñ torışı turında da fiker alıştı.

Ärdoğan “terrorçılıqtan arındırılğan, här ölkädä üseş alğan tınıç Süriyäneñ regional totrıqlılıqqa öleş kertäçägenä” basım yasadı.

Ğazzädä tınıçlıq öçen AQŞ belän koordinaśiyä

Ğazzä mäs’äläsenä dä tuqtalıp uzuçı Ärdoğan, töbäktä tınıçlıq urnaştırıluına qağılışlı tırışularnıñ däwam itelüen belderep, Törkiyäneñ bu mäs’älädä AQŞ belän koordinaśiyä êçendä xäräkät itüne däwam itäçägen äytte.

Ärdoğan monnan tış Ğazzä tınıçlıq şurasına çaqırğanı öçen Trampqa räxmät äytte.

Tramp sişämbe könne yasağan belderüendä “bik yaratqan” Ärdoğan belän “bik möhim” telefon söyläşüen ütkäräçägen äytkän ide.

Aq Yort comğa könne Trampnıñ Ğazzädä İzrailneñ genośidın  bötenläygä beterügä häm töbäkneñ torğızıluına yünältelgän 20 mäddälek planınıñ tormışqa aşırıluında “ähämiyätle rol uynayaçaq” Ğazzä tınıçlıq şurasınıñ tözelüen iğlan itte. Şuranıñ strategik küzätüne täêmin itüe, xalıqara çığanaqlarnı mobilizaśiyäläwe häm Ğazzäneñ bäreleşlärdän tınıçlıq häm üseş barışına küçüdä xisap birä aluçanlıqnı buldıruı kötelä.

AQŞ monnan tış Trampnıñ Ğazzä tartqalaşuın beterügä yünältelgän kiñqırlı planınıñ ikençe êtabın ğämälgä kertü öçen Ğazzä idaräse milli komitetın, Qoruçı başqarma şurasın häm küçeş çorına bulışlıq itü maqsatınnan çığıp Ğazzä başqarma şurasın da tözede.

Tramp qayber däwlät häm xökümät başlıqların, şul isäptän Törkiyä İlbaşı Räcäp Tayyip Ärdoğannı da şura êşendä qatnaşırğa çaqırdı.