Sudanda altın şaxtası işelde: altı keşe hälaq buldı, distälärçäse äle dä êçtä qalğan
Cimereklär astında qalğan şaxtaçılarnı qotqaru operatsiyäse däwam itä.
Sudan tabiblar çeltäre comğa kiçendä Könyaq Kordofan regionında altın şaxtası işelüe näticäsendä altı keşeneñ hälaq buluın, 12 keşeneñ yaralanuın häm distälärçä keşeneñ äle tabılmawın citkerde.
Oyışma comğa kiçendä bastırılğan belderüdä waqıyğanıñ Äbü Cübäyhä töbägendäge altın şaxtasında kilep çığuı äytelä.
Qotqaru êşläreneñ tizlätergä häm yaralanuçılarğa aşığıç meditsina yärdäme kürsätergä çaqıru yasaldı.
Törkem, şulay uq, mondıy hälakätlärneñ qabatlanmawı öçen xökümätneñ şaxtaçılarnı saqlayaçaq çaralar kürergä tiyeşlegen assızıqladı. İminlek standartlarınıñ bilgelänüe, uqıtu-öyrätü çaraları ütkärülüe häm daimi kontrol’ yasaluı çaqıruı belän çıqqan oyışma şirkätlärdäge iğtibarsızlıq häm qanunnarnıñ ütälmäweneñ şaxtaçılarnıñ tormışın qurqınıç astına quyuın belderde.
Belderüdä cawaplı keşelärneñ xisap birergä tiyeşlege häm oxşaş facıyğalarnı buldırmaw öçen konkret adımınar yasaluı zarurlığı da äytelde.
Keçe külämle altın qazu sänäğate Sudanda, küp oçraqta çiktän tış awır şartlarda, 2 millionnan artıq keşene êş belän täêmin itä häm ilneñ tulayım altın çığaruınıñ yaqınça 80 protsentın alıp tora.
Sudan xökümäte qul belän qazu êşlären tıymıy, ämmä tärtipkä salırğa tırışa. Qayber tiskäre yaqlarına qaramastan, bu tarmaq küp sandağı sudanlı öçen êş urını tudıra häm xezmät belän täêmin itügä öleş kirtä.
Sudan, 2011nçe yılda Könyaq Sudannan ayırılıp çıguı belän neft’ keremnäreneñ dürttän öç öleşen häm valyuta çığanaqlarınıñ yaqınça 80 protsentın yuğaltqannan soñ, altınğa möhim valyuta çığanagı bularaq zur däräcädä bäyle qaldı.