İrannıñ AQŞ belän söyläşülärdä Djey Di Vênsqa östenlek birüe söylänä
Töbäk çığanaqları "CNN"ğa AQŞ ilbaşı urınbasarı Djey Di Vênsnıñ suğışnı tuqtatunı tağın da kübräk teläwe uylanıluın äytte.
İran Tramp administratsiyäsenä, başqa yuğarı däräcäle türälär belän tügel, ä ilbaşı urınbasarı Djey Di Vêns belän söyläşülär alıp barunı östen kürüen belderde.
“CNN”, ike töbäk çığanağına sıltama yasap, İran wäkilläreneñ AQŞ-İzrail xärbi xäräkäte belän tämamlanğan êlekkege söyläşülärdän soñ "ışanıç citmäw" säbäple maxsus wäkil Stiv Witkoff yäki Jared Kuşner belän qabat oçraşudan baş tartuların belderde.
Çığanaqlar äytüençä, Vênsnıñ suğışnı tuqtatu teläge kübräk dip sanala, ber çığanaq Vênsnıñ "konfliktnı tuqtatuğa omtıluı" turında fiker yörtä.
İkençe çığanaq bolay di: "Administratsiyä kemne cibärergä qarar qılsa, iranlılar şul keşe belän êş itärgä tiyeş bulaçaq, läkin bu alarnıñ başqa saylaw mömkinlege yuq digänne añlatmıy."
Xisapta bu atna axırında İslamabadta oçraşu ütkärü äle dä qarala dip äytelä, läkin çığanaqlarnıñ anıñ bulaçağına şiklänülären belderdelär.
AQŞ İlbaşı Donald Tramp sişämbe könne irtän AQŞnıñ İran belän "xäzerge waqıtta söyläşülär alıp baruın" häm Vêns, däwlät särqatibe Marko Rubio, Witkoff häm Kuşnernıñ diplomatik tırışlıqlarda qatnaşuın äytte.
AQŞ İranğa Paqıstan aşa 15 punkttan toruçı suğışnı tögälläw planın cibärgän, anda Tährannıñ atom-töş häm ballistik raketalar programmaları, şulay uq, Ormuz buğazındağı diñgez iminlege belän bäyle adımnar kürsätelgän.
İran räsmiläre qayber "dus illärdän" AQŞnıñ suğışnı tuqtatu öçen söyläşülär ütkärü üteneçe turında xäbärlär aluların, läkin Vaşington belän turıdan-turı söyläşülär alıp barmawların äytte.