Şveśiya Ukrainağa finanslawnı arttıra, 5 ilgä yärdäm kürsätüne tuqtata
Stokgol’m Boliviya, Liberiya häm Zimbabveda yärdäm êşçänlegenä yünältelgän 3 ilçelekneñ yabılaçağın belderde.
Şveśiyäneñ däwlät televideniyese “SVT” ilneñ Afrika häm Kön’yaq Amerikadağı 5 ilgä birelgän ozaq möddätle üseş yärdämen äkrenläp tuqtataçağın häm bu çığanaqlarnı Ukrainağa yünältäçägen xäbär itte.
Xalıqara üseş xezmättäşlege häm tışqı säwdä ministrı Benjamin Dousa comğa könne xökümätneñ Tanzaniya, Mozambik, Zimbabve, Liberiya häm Boliviyägä yärdäm kürsätüne tuqtataçağın äytte.
Gadättä bu illärgä birelgän 212 million dollarnıñ Ukrainağa küçereläçäge belderelde.
Dousa:
"Ukrainağa yärdäm itü – bezneñ burıçıbız häm cawaplılığıbız. Byudjet balanslansın öçen aqça qaydandır kilergä tiyeş”, – dip äytte.
Ozın möddätle yärdäm programmaları 2026 nçı yılnıñ 31 nçe avgustına qadär tämamlanaçaq.
Bu adım xökümät Şveśiyäneñ gomumi yärdäm byudjetı kiläse yılda 5,95 milliard dollardan 5,63 milliard dollarğa qadär kimiyäçäk digän belderüennän soñ yasaldı.
Dousa monnan tış, yärdäm êşçänlegenä yünältelgän Boliviya, Liberiya häm Zimbabvedäge öç ilçelekneñ yabılaçağın da belderde.
Ul bolay dide:
"Bu adım älege öç il belän diplomatik bäyläneşlärebezne beterü digän süz tügel; ä kiresençä mönäsäbätlärne kiläçäktä säwdä häm xalıqlar arasındağı bäyläneşlärgä kübräk iğ’tibar birüçe başqa formalarda däwam itäçäk digänne añlata”.
Dousa ozın möddätle programmalardağı üzgäreşlärneñ gumanitar yärdämgä täêsir itmäyäçägen citkerde.