"Bez almasaq, Grenlandiyäne Rusiyä yäki Qıtay alaçaq"
Tramp Vaşington citäkçelegeneñ Arktikanı qulğa töşerü öçen härtörle yuldan êş başqaraçağın äytte
AQŞ ilbaşı Donald Tramp Grenlandiyäne yawlap alu yanawların qabatladı häm Vaşington citäkçelegeneñ Arktikanı qulğa töşerü öçen härtörle yuldan êş başqaraçağın äytte.
Comğa könne Aq Yortta neft häm gaz tarmağı citäkçeläre belän ütkärgän cıyılışta çığış yasağan Tramp Daniyaneñ Grenlandiyädäge suverenlığın kire qaqtı häm AQŞnıñ qatışuın milli iminlek zaruriyäte bularaq täqdim itte.
Tramp: “Alar teläsälär dä, telämäsälär dä, bez Grenlandiyä mäs’äläsendä nider êşläyäçäkbez. Çönki monı başqarmasaq, Rusiyä yäki Qıtay Grenlandiyäne yawlap alaçaq, bez bu ike ilgä kürşe bulırğa telämibez. Bez Rusiyägä yäki Qıtayğa Grenlandiyäne yawlarğa röxsät itmäyäçäkbez,” - dide.
Daniya häm Grenlandiya räsmi zatları belän kileşü tözüne xuplawın äytkän Tramp köç qullanunıñ da variant bulıp qaluın belderde.
Donald Tramp: “Belgänegezçä, min ğädättä ciñel yulnı saylıym. Ämma ciñel yuldan xäl itä almasaq, awır yuldan baraçaqbız,” dide.
Daniya häm başqa Awrupa berlektäşläre Trampnıñ süzlärenä cawap birde häm Grenlandiyane yawlap alu tırışlıqlarınıñ NATOnı häm İkençe Bötendönya suğışınnan soñğı iminlek tärtiben zäğiflätäçäge turında kisätte.
Daniya premyer-ministrı Frederiksen monnan alda Transatlantik ittifaqı häm yıllar buyı däwam itüçe urtaq iminlek tärtiplären küzdä totıp, AQŞnıñ Grenlandiyane basıp aluınıñ bar närsäne beteräçägen äytkän ide.
Grenlandiyada bolay da AQŞ xärbi bazası urın ala häm Vaşington citäkçelegeneñ biredä inde küptännän strategik kontingentı bar.
Trampnıñ belderüläre kübräk kontroldä totuğa işaräli.
Belderüneñ waqıtı da iğtibarnı cälep itte.
Venesuêla ilbaşı Nikolas Maduronıñ qulğa alınuı belän tögällängän xärbi operaŝiya Vaşington citäkçelegeneñ çik aryağında köç qullanu täwäkkällelege mäs’äläsendä borçu tudırdı.