Törkiyä ilbaşı Ramazan bäyrämendä berdämlekkä çaqırdı
Ärdoğan bäyrämdä Törkiyädä berdämlek häm tuğanlıqnıñ nığuın teläwen belderde
Törkiyä ilbaşı Räcäp Tayyip Ärdoğan comğa könne Ramazan bäyräme uñayı belän yasağan yullamasında berdämlek häm teläktäşlekkä basım yasadı, şul uq waqıtta Yaqın Könçığıştağı soñğı waqıyğalarğa bäyle borçuların citkerde.
Rizäneñ Günäysu rayonındağı “Märkäz” mäçetendä bäyräm namazınnan soñ yasağan çığışında Ärdoğan Ramazan ayınıñ tögällänüe häm bäyrämneñ kilüe İslam dönyası öçen yañaru bulırğa tiyeşlegen äytte.
"Unber aynıñ soltanı bulğan möbaräk Ramazan ayı uzıp ta kitte häm bügen - Ramazan bäyräme. Rabbım Ramazan bäyrämen böten İslam dönyası öçen qotıluğa häm yañadan tuuğa säbäp qılsın", — dide.
Bäyrämdä Törkiyädä berdämlek häm tuğanlıqnıñ nığuın teläwen beldergän Ärdoğan, Yaqın Könçığıştağı barışlarğa da tuqtaldı häm töbäkneñ "qaynawın" äytte.
İzrailgä işärälägän ilbaşı: "Bu sionist İzrail yözlägän, meñlägän keşene üterde. Monıñ öçen cawap biräçägenä şigem yuq,” — dide.
Ärdoğan çığışın yaxşı teläklär belän tögälläde. "Rabbım yärdämçebez bulsın. İlebez, millätebezneñ bäyräme möbaräk bulsın", — dide.