İzrail köçläre Cäningä basqın oyıştırğan
Yordannıñ könbatış üzänlegendä mäktäplär yabılğan.
İzrail köçläre basıp alınğan Yordannıñ könbatış üzänlegendäge Cänin şähärendä çärşämbe irtäsendä kiñ külämle basqın başlattı.
Waqıyğa şahitları bu operaśiyäne toraq punktlarğa yünältelgän kiñ qolaçlı iminlek operaśiyäse dip bäyäläde.
Cirle çığanaqlar xäbär itüençä, yäşeren êş alıp barğan İzrail bülekçälare irtän irtük Cäninneñ könçığış mäxälläsenä kerep, ber keşeneñ yortın basıp alğan häm anı waqıtlıça xärbi ştabqa äyländergän.
Şahitlar berniçä keşeneñ qulğa alınuın häm waqıyğa urınında soraw alınuın añlatqan.
Mäktäplärdä däreslär tuqtap qalğan
Basqınğa cawap itep, Fälästin Mäğarif ministrlığı xärbi operaśiya däwam itü säbäple uquçılarnıñ iminlegen täêmin itü maqsatınnan Cänindäge mäktäplärneñ yabıluın citkerde.
Basıp alınğan başqa töbäklärdän dä kiyerenkelek xäbärläre kilgän. Üzäk Ramallah şähärendä, cirle çığanaqlarğa kürä, qanunsız kilep urnaşqan izraillelär fälästinlelärneñ ike maşinasın yandırğan, yaqındağı yortlarğa rasist şiğar’lär yazğannr.
Bu basqın İzrail 2023 yılnıñ oktyabrendä Ğazzägä qarşı başlağan suğıştan soñ basıp alınğan Yordannıñ könbatış üzanlegendä üz operasiyälären kiñäytüen däwam itkän waqıtta buldı.
Fälästin räsmi zatları beldergänçä, şul waqıttan birle İzrail köçläre häm kilep urnaşuçılar kim digändä 1097 fälästinlene ütergän; yaqınça 11 000 keşene yaralağan häm 21 000 keşene qulğa alğan.
Uzğan yılnıñ iyülendä BMO Xalıqara mäxkämäse İzrailneñ Fälästin cirlären basıp aluın qanunsız dip iğ’lan itkän häm basıp alınğan Yordannıñ könbatış üzänlege belän Könçığış Qodüstäge barlıq İzrail toraq punktların êvakuaśyäläwne taläp itkän möhim täq’dim çığardı, läkin bu qararlar älegä ütälmäde.