İran suğışında AQŞnıñ yuğaltuları küpme?
AQŞ häm İzrail İranğa höcüm itä başlağannan birle İran Yaqın Könçığışta kim digändä cide AQŞ xärbi urının maqsat itep aldı
“Anadolu” agentlığı tarafından tuplanğan farazlarğa köre, şimbä könennän birle İranğa qarşı höcümnärdä AQŞ yaqınça 2 milliard dollar qıymmätendäge xärbi texnikasın yuğalttı.
Zararnıñ töp säbäbe — Qatardağı El-Udeid hawa bazasında bulğan AQŞta yasalğan AN/FPS-132 aldan kisätü radar sisteması. Bäyäse 1 milliard 100 million dollar dip kürsätelgän bu radarğa şimbä könne İran tarafından raketa höcüme oyıştırıldı. Qatar radarnıñ zarar kürüen räsmi räweştä rasladı.
Yäkşämbe könne isä Küväyt hawa saqlanu sistemaları tarafınnan açılğan dustanä ut näticäsendä 3 “F-15E Strike Eagle” oçqıçı bärep töşerelde. Altı keşelek ekipajnıñ barısı da qotqarıldı, läkin oçqıçlar qullanılmas xälgä kilde. Bu oçqıçlarnıñ bäyäse - yaqınça 282 million dollar.
İran, şimbä könne başlağan cawap höcümendä Baxreynneñ Manama şähärendäge AQŞ flotınıñ bişençe ştabına ut açtı häm ike iyärçen êlemtä terminalı belän berniçä zur binanı yuq itte.
Açıq çığanaqlı küzätü xisaplarına küz salğanda, maqsat itep alınğan SATCOM terminalları “AN/GSC-52B” dip tanıldı; alarnı urnaştıru çığımnarın da isäpkä alğanda, bäyäläre yaqınça 20 million dollar dip belderelä.
İran şulay uq Berläşkän Ğaräp Ämirleklärendäge El-Ruveys sänäğät şähärendä urnaşqan THAAD ballistik raketa saqlanu sistemasınıñ AN/TPY-2 radar komponentın yuqqa çığaruın däğwa itte. Açıq çığanaqlı iyärçen yazmalarında da maqsatqa tiyüe kürenä. Yuqqa çığarılğan bu radar komponentı yaqınça 500 million dollarlıq dip isäplänä.
Bu çığımnar berläşterelgäç, İrannıñ AQŞqa yaqınça 1 milliard 902 million dollarlıq zıyan kiterüe isäplängän.