Bötendönya sälamätlek saqlaw oyışması Ğazzägä yärdämen arttırdı
Oyışma ğomum mödire sälamätlek saqlaw qorılmaların torğızunıñ bik möhim adım buluın äytte
Bötendönya sälamätlek saqlaw oyışması Ğazzädä utnı tuqtatu kileşüe ğamälgä kergännän soñ yärdäm operaŝiyalären arttırdı.
Bötendönya sälamätlek saqlaw oyışması ğomum mödire qamalış astındağı töbäktä sälamätlek saqlaw qorılmaların torğızunıñ bik möhim adım buluın äytte.
Oyışma İzrail belän “Xamas” arasında Ğazzädä ğamälgä kergän kileşüdän soñ operaŝiyalären arttıruın açıqladı.
Oyışma ğomum mödire Tedros Adanom Gebreisus düşämbe könne X platformasında belderü yasap, “Al-Ahli” xastaxanäsendä xirurgiya häm reanimaŝiya xezmätlären nığıtu öçen 24 sägat êçendä aşığıç mediŝina törkemeneñ bilgelänüen citkerde.
8 yök maşinasına töyälgän insulin, laboratoriya materialları häm darular Ğazzägä kiterelde.
Tedros şulay uq oyışmanıñ yaman şeş daruları häm qalğan möhim mediŝina materialların Ğazzä xastaxanäsenä ireşterüen äytte.
“Sälamätlek saqlaw qorılmalarına yärdämne arttıru häm operaŝional missiyalärebezne kiñäytü Ğazzädäge fälästinlelärgä aşığıç yärdäm kürsätü öçen berençe adımnar bulıp tora,” – dide ul.
“Bu atnadağı täraqqıyätlär döres yulda yasalğan ähämiyätle adım buldı,” – digän ğomum mödir Bötendönya sälamätlek saqlaw oyışmasınıñ tormış saqlap qalu häm töp sälamätlek saqlaw xezmätlären qabat kürsätü öçen tırışlıqların zur ülçämdä arttırırğa äzer buluın assızıqladı.
Bötendönya sälamätlek saqlaw oyışması ğomum mödire tübändägeçä däwam itte: “Ğazzäneñ sälamätlek saqlaw sistemasın êlekke xälenä qaytaru belän genä qalmıyça tağın da köçle, ğadel häm xalıq ixtıyaclarına yaraqlı räweştä qabat tözü zarur. İñ yaxşı daru – tınıçlıq.”
Ğazzädä utnı tuqtatu kileşüeneñ berençe êtabı AQŞ ilbaşı Donald Tramp täqdim itkän plan qısalarında comğa könne ğamälgä kerde.
Düşämbe irtänge sägätlärdä “Xamas” 20 izraille äsirne cibärgännän soñ İzrail törmälärendäge fälästinlelär dä irekkä çığa başladı.
Ğazzädäge suğışta 68 meñ tiräse Fälästin keşese ülde.