BMO: “İzrail här 8-9 minutta ber Ğazzäne bombalıy”

Berläşkän Millätlär Oyışması (BMO) Ğazzä xalqı öçen qotıçqıç näticälär turında kisätte, çönki İzrail köçläre qamalış astında bulğan bu töbäkkä hawa höcümnären arttırdı.

BMO süzçese Stefan Dujarrik, Humanitar êşlärne koordinaśiyäläw ofisına (OCHA) tayanıp, jurnalistlarğa: "Sonğı 24 säğät êçendä İzrail köçläre höcümnären arttırdı, bu isä tınıç xalıq öçen qotıçqıç näticälärgä kiterde. Urtaça, bu 8-9 minut sayın ber hawa höcüme digän süz", – dip belderde.

Ul şulay uq BMO törkemnäreneñ xalıqnıñ küçenüen küzätüen häm "atnakiçen (pänceşämbe könne) genä tönyaq Ğazzädän könyaqqa yaqınça 16 meñ 500 keşeneñ küçenüeneñ terkälüen iskärtep uzdı.

Dujarrik äytüençä, yärdäm xezmätkärläre küçenü yulları buylap urnaşqan, alar psixologik berençel yärdäm kürsätä, kiräk bulğanda maxsus xezmätlärgä yünältä häm yaña kilüçelärne şartlamağan xärbi kiräk-yaraqlar mäs’äläsendä kisätä.

Şulay da, bu tırışlıqlarga qaramastan, Dujarrik äytüençä, yöz meñnärçä keşe Ğazzädä qala birä, iminlek bulmaw säbäple, alar humanitar yärdämgä nıq bäyle. Küp kenä möhim xezmätlär yabılğan yäisä başqa urınğa küçerelgän.

İzrailneñ humanitar yärdämgä ireşüne totqarlawı belän bäyle bularaq Dujarrik pänceşämbe könne: "Ğazzädä törle urınnarda keşelärgä yärdäm kürsätü öçen İzrail xakimiyätläre belän koordinaśiyäläw maqsatında 15 xäräkät täqdim itelde, şularnıñ barı tik 7se genä tulısınça tormışqa aşırıldı", – dip xäbär itte.

Ul “OCHA”nıñ İzrailne "humanitar operaśiyälärne tulısınça tä'min itärgä, şul isäptän Ğazzä töbägenä yärdämne kirtäsiz kertüne häm taratu yulların açarğa" çaqıruın basım yasap äytte.

Okupaśiyälängän Yordannıñ könbatış üzänlege mäs’äläsenä dä tuqtalıp uzuçı Dujarrik 2023nçe yılnıñ oktyabrennän birle İzraille qanunsız kilep urnaşuçılarnıñ höcümnäre häm İzrailneñ kerü çikläwläre säbäple 3 mennän artıq fälästinleneñ, şularnıñ yartısı balalar, küçenüen belderde.

BMO Ğazzädä İzrailneñ däwam itüçe suğışınıñ humanitar bäyäse turında qabat-qabat kisätte. Ğazzä sälamätlek saqlaw ministrlığı mäğlümatlarına kürä, 2023nçe yılnıñ oktyabrennän birle 65 meñ 400dän kübräk keşe ülgän häm bu sannar BMO tarafınnan ışanıçlı dip sanala.