Nigeriyädäge terror höcümendä 50 keşe hälaq bulğan

Nigeryäneñ tön’yaq-könbatışında urnaşqan  Zamfara ştatındağı awılğa oyıştırılğan höcümdä kim digändä 50 keşe hälaq bulğan, küp sanda xatın-qızlar häm balalarnı urlağannar.

Cirle xalıq banditlar dip atağan terrorçılar tarafınnan başqarılğan höcüm pänceşämbe kiçendä başlanğan häm comğa irtäsenä qadär däwam itkän.

Motośiklda yörüçe höcümçelär Tungan Dutse awılında qaçarğa tırışqan tınıç xalıqqa ut açqan häm binalarğa ut törtkän. Zamfara ştatı Mäcles äğ’zası Hamisu Faru waqıyğanı şimbä könne “Anadolu” agentlığına rasladı.

Faru: “Pänceşämbe kiçennän comğa irtäsenä qadär berkem dä yoqlamadı. Qayberläre öç ğailä äğ’zasın yuğalttı”, — dide.

Hälaq bulğannarnıñ mäyetläre aq käfennärgä törelgän häm şimbä könne kümäk  cirläw öçen äzerlängän. Urlanğan keşe sanı isä älegä tögäl bilgele tügel, çönki cirle wäqalätlelär  yuğalğannarnı açıqlaw östendä êşli.

Nigeriyädä ayıruça Zamfara ştatı urnaşqan tön’yaq-könbatış töbäktä iminlek torışı bik awır bulıp qala.

Töbäktä küptännän birle qorallı bandalarnıñ höcümnäre, keşe urlaw häm üterülär küzätelä; meñlägän keşe yäşägän cirlärennän küçerelde, tağın da kübräge qurqınıç astında.

Nigeriya xökümäte bu problemanı xäl itü öçen ğaskärlär urnaştıru, şulay uq texnik yärdäm häm mäğ’lümat almaşu maqsatında Amerika Quşma Ştatları kebek xalıqara partnyerlar belän xezmättäşlek itü kebek adımnar yasadı.

Läkin qorallı cinayät’çel bandalar häm ğıys’yançı suğışçılarnıñ iminlekkä yanawları säbäple xäl qatlawlı bulıp qala.