İzrail Ğazzädä tağın 12 fälästinlene ütergän

Şimbä irtäsendä İzrailneñ Ğazzäneñ törle töbäklärenä oyıştırğan hawa höcümnärendä kim digändä 12 fälästinle hälaq bulğan.

Mediśina çığanaqlarına qarağanda, Ğazzä şähäreneñ könbatışındağı Rimal mäxälläsendä toraq yortqa oyıştırılğan İzrail hawa höcümendä 5 fälästinle, şul isäptän 3 bala, 2 xatın-qız ğomeren yuğaltqan, küp sanda keşe yaralanğan.

Kön’yaq Ğazzädäge Xan Yunus şähäreneñ tön’yaq-könbatışında urnaşqan Asda töbägendä isä küçenep kilgän grajdannar yäşägän çatırğa yasalğan hawa höcümendä 1 ir-at, anıñ 3 ulı häm 3 keçkenä onığı hälaq bulğan.

Bu mäğ’lümatnı şähärdäge Naser xastaxanäse sälamätlek saqlaw xezmätkärläre dä raslağan.

Şahitlar xäbär itüençä, Ğazzä şähäreneñ könçığışındağı Tuffah mäxälläsendä toraq yortqa oyştırılğan İzrail höcümendä dä küp sanda fälästinle yaralanğan.

İzrail xärbi oçqıçları şulay uq Ğazzä şähäreneñ tön’yaq-könbatışındağı äl-Calaa uramına häm Ğazzä üzägendäge Buräyc qaçaqlar lagerınıñ könçığışına da höcüm itkännär.

Bu höcümnärdä ülüçelär turında mäğ’lümat yuq.

Oktyabr’ başında utnı tuqtatu üz köçenä kergännän birle İzrail höcümnärendä 524 fälästinle hälaq bulğan, 1 360 keşe yaralanğan häm kileşüne 1 450 bozu oçrağı terkäl­gän.

Bu mäğ’lümatnı Ğazzä media ofisı şimbä könne urtaqlaşqan.