Tramp AQŞnıñ İrannan 2–3 atna êçendä çığaçağın belderde

AQŞ ilbaşı Donal’d Tramp Amerika köçläreneñ İrannаn ike-öç atna êçendä çığaçağın äytep, bu ilgä höcümnärneñ tämamlanaçağına işaräläde.

Tramp Aq Yortta jurnalistlarğa yasağan belderüendä:“Miña êşlärgä kiräk bulğan berdänber närsä İrannan kitü häm bez monı bik tizdän êşläyäçäkbez”, — dide.

Ul ildän çığunıñ bälki ike, bälki öç atna êçendä bulaçağın äytep: “Bez tizdän kitäçäkbez”,-dide.

AQŞ ilbaşı üz citäkçelegeneñ İrannıñ atom -töş qoralları buldıruın totqarlaw maqsatına ireşüen belderep: “Alarnıñ atom -töş qoralları bulmayaçaq häm bu maqsatqa ireşelde”,-dide.

Trump şulay uq AQŞ höcümnäreneñ İrannıñ xärbi mömkinleklären sizelerlek qaqşatuın häm Tähranğa alarnı torğızu öçen  15–20 yıl kiräk bulırğa mömkin dip belderde.

 “Bik tizdän kitäçäkbez häm Franśiya yäisä başqa ber il neft’ yäki gaz alırğa teläsä, alarğa Ormuz buğazı aşa ütärgä turı kiläçäk. Alar üzläre öçen qayğırtırğa tiyeş bulaçaqlar. Çınlıqta min monıñ qurqınıçsız bulaçağın uylıym, läkin monıñ bezgä bernindi qatnaşı yuq”,-dide Tramp.

 AQŞ häm İzrail 28 fevral’dän birle İranğa hawa höcümnäre oyıştıra; bu höcümnärdä 1.340tan artıq keşe hälaq buldı.

İran isä İzrailgä, şulay uq AQŞ xärbi köçläre urnaşqan Yordaniya, Ğıyraq häm Farsı qultığı illärenä pilotsız oçu apparatları häm raketa höcümnäre belän cawap birde.

Räsmi sannarğa qarağanda, suğış başlanğannan birle kim digändä 13 AQŞ xärbiye hälaq buldı.

Bäreleşlär ênergiya bäyälären kütärde, şulay uq Ormuz buğazı aşa diñgez transportında özekleklärgä säbäp buldı, bu global’ neft’’ taşunıñ zur öleşe ütä torğan strategik yul.