Ärdoğan Tramp belän Venesuêla häm Ğazzä turında söyläşte
Ärdoğan häm Tramp Törkiyä-AQŞ mönäsäbätläre, saqlanu xezmättäşlege häm regional temalarnı kütärde
Törkiyä räsmi zatları ilbaşı Räcäp Tayyip Ärdoğan belän Amerika Quşma Ştatları (AQŞ) liderı Donald Trampnıñ ikeyaqlı mönäsäbätlär, töbäk häm global mäs'älälärne qaraw öçen telefonnan söyläşü ütkärüen belderde.
Êlemtä idaräsennän yasalğan açıqlawğa kürä, ike lider Törkiyä belän AQŞ arasındagı säyäsi mönäsäbätlärne, saqlanu sänäğate ölkäsendäge xezmättäşlekne, ike aradağı säwdä äyläneşe maqsatına ireşü öçen yasalaçaq adımnarnı, Ğazzä häm Venesuêlanı da kertep dönyaküläm mäs'älälärne qaradı.
Ärdoğan êlegräk yasalğan belderüendä, söyläşüdä Änkaranıñ Venesuêlağa qağılışlı borçıluların citkerüen äytkän ide.
Ärdoğan Ministrlar şurası cıyılışınnan soñ yasalğan açıqlawında: "AQŞ ilbaşı Tramp belän telefon söyläşüendä Törkiyäneñ borçuların üzenä citkerdek. Venesuêlanıñ totrıqsızlıqqa êtärelmäskä tiyeşlegenä basım yasadıq," — dide.
İlbaşı Ärdoğan Törkiyäneñ Venesuêla xalqına yärdämen däwam itäçägen dä süzlärenä östäde.
Ärdoğan: "Törkiyä häm törek milläte alğa taba da mullıq, tınıçlıq häm üseş yulın êzläwçe dus Venesuêla xalqı yanında bulaçaq," — dide.
Aq Yorttan söyläşüneñ detalläre turında älegä belderü yasalmaldı.