Sudannıñ Kordofan töbägendä 40 keşe üterelde
Höcüm, “Operativ yärdäm köçläre” şähärgä taşlanırğa äzerlängän, armiyä berlekläre isä älege köçlärne tarqatu öçen cıyılğan waqıtta bula.
Sudannıñ üzäk Kordofan töbägendäge Äl Obeid şähärendä cenaza waqıtında yasalğan höcüm näticäsendä 40 keşe hälaq bulğan, dip xäbär itä Berläşkän Millätlär Oyışmasınıñ gumanitar êşlär koordinatsiyäse ofisı.
Belderüdä höcümneñ qayçan buluı häm kem tarafınnan başqarıluı turında mäğlümat birelmägän, ämma bu waqıyğa paramilitar "Operativ yärdäm köçläre" (RSF) şähärgä höcüm başlarğa äzerlängän häm armiya köçläre alarnı tuqtatu öçen cıyılğan waqıtqa turı kilä.
"Kordofan töbägendäge iminlek xäle naçarlana bara," dip belderde Berläşkän Millätlär Oyışmasınıñ gumanitar êşlär koordinatsiyäse ofisı çärşämbe könne.
Öç Kordofan töbäge — Tönyaq, Könbatış häm Könyaq Kordofan — soñğı waqıtta Sudannıñ armiya köçläre belän “Operativ yärdäm köçläre” arasında qatı bäreleşlärgä şahit buldı.
Paramilitar törkem 26 oktyaberdä Tönyaq Darfur töbägeneñ başqalası Äl-Faşir şähären dä yawlap aldı. Cirle häm xalıqara oyışmalar mäğlümatına qarağanda, tınıç xalıqnı üterü oçraqları başqarılğan. Bu waqıyğalar ildäge suğıştan zıyan kürgän töbäklärneñ geografik büleneşenä kiterü mömkinlege turında kisätülär tudırdı.
2023 yılnıñ aprelennän birle Sudan armiya köçläre belän “Operativ yärdäm köçläre” arasında barğan watandaşlar suğışı meñlägän keşeneñ ğömeren özde, millionlağan keşene küçenergä mäcbür itte häm dönyadağı iñ naçar humanitar krizislarnıñ bersen tudırdı.