Yaponiyäne selketkän 7,4 ball zurlığındağı cir teträw śunamiğa kiterde
Yaponiyäneñ tönyaq häm tönyaq-könçığışındağı Tın okean yarı buyınça yaqınça 3 metrğa qädär kütärelergä mömkin bulğan śunami iskärtüe birelde.
Düşämbe kiçendä Yaponiyädä bulğan 7,4 ballı cir teträwdän soñ, ilneñ tönyaq häm tönyaq-könçığış öleşlärendä śunami dulqınnarı küzätelde.
AQŞ Geologik tikşerenüläre mäğlümatlarına kürä, (GMT) Grinviç waqıtı belän 07:52 säğättä terkälgän cir teträwneñ üzäge İvate prefekturasındağı Miyako şähärennän yaqınça 114 kilometr yıraqlıqta bulğan.
Yaponiyä xökümäte zilziläneñ zurlığın 7,5 ball dip terkäde häm Xokkaydo, Aomori häm İvate prefekturalarında Tın okean yarı buyınça śunami turında iskärtü birde.
Xökümät belderüendä: "Yar buyında yaki yılğa tiräsendä yaşäwçelär tiz arada biyegräk häm qurqınıçsızraq urınnarğa êvakuaśiyälänergä tiyeş", — dip äytelgän.
"Kyodo News" xäbär itüençä, Tın okeandağı İvate häm Aomori prefekturaları yarlarında tsunami dulqınnarı küzätelgän.
Räsmi zatlar śunaminıñ öç metrğa qadär biyeklekkä citüe turında iskärtte. Aomori häm Miyagi prefekturalarındağı atom êlektr stantsiyälärendä "bernindi anomaliyälär terkälmägän" diyelde.
Cir teträwdän soñ başqala Tokio häm Aomori prefekturası arasında tizyöreşle poyezdlar yöreşe tuqtatıldı.
Xökümät räise Sanaê Takaiçi zıyan kürgän rayonnarda yaşäwçe xalıqnı śunami bulu ixtimalı bulğan oçraqta "biyegräk urınnarğa menärgä" çaqırdı.
Cir teträw näticäsendä bernindi zıyan da terkälmägän.