Ärdoğan İranda tınıç xalıqnıñ ğazaplanuın qatğıy tänqıytläde häm bäreleşlärne tuqtatunı taläp itte

Törkiyä Cömhüriyäte ilbaşı Räcäp Tayyip Ärdoğan İrandağı tınıç xalıq yuğaltuları arqasında tirän qayğıda buluın belderep, tınıçlıqnı täêmin itügä yärdäm itär öçen utnı tuqtatu maqsatı belän diplomatik tırışlıqlarnıñ arttırılaçağın äytte.

Düşämbe könne başkent Änkarada uzğan ber çarada çığış yasap, ilbaşı: “Kürşeläre häm qardäşläre bularaq İran xalqınıñ qayğısın urtaqlaşabız. Här suğışta bulğan kebek, monda da bäreleşlärneñ barlıq awırlığın tınıç xalıqnıñ häm ber ğayepsez balalarnıñ çigüen kürep özgälänäbez” — dip belderde.

Ärdoğan Törkiyäneñ utnı tuqtatu häm töbäktä tınıçlıq yañadan urnaşqançı här däräcädä êlemtälären köçäytäçägen citkerde.

Ärdoğan barlıq bu protsesslar buyınça şimbä könnän birle küp sandağı lider belän kiñqırlı söyläşülär ütkärüen xäterlätep: “Bez solıx tarafdarı. Qan aqmawın, küz yaşläre tınuın, töbägebez inde yıllar buyı sağınıp kötkän tınıçlığına ireşüen telibez,” — dip söyläde.

NATO ğomum särqatibe belän telefon söyläşüe

Ärdoğan, şulay uq, İranğa qarşı höcümnär häm bäreleşlärdän soñ NATO ğomum särqatibe Mark Rutte belän telefon söyläşüe ütkärde.

Törkiyä Cömhüriyäte İlbaşı êlemtä idäräsennän yasalğan belderügä kürä, Ärdoğan Rutteğa Törkiyäneñ “töbäktäge bäreleş protsessın sizger räweştä küzätep baruın” häm “daimi häm totrıqlı tınıçlıq öçen diplomatiyägä mömkinlek birelüeneñ möhim buluın” citkerde.

İlbaşı Ärdoğan, şulay uq, Änkarada oyıştırılaçaq NATO Liderlar sammitı belän bäyle äzerleklärneñ däwam itüen, “Törkiyäneñ sammitnı layıqlı räweştä qabul itäçägen” belderde.

Rutte isä NATOnıñ “söyäşüçelärneñ iminlegen täêmin itügä 360 däräcäle qaraş belän öleş kertüne däwam itäçägen” belderde.