Greśiya prem’yer-ministrı Törkiyägä säfär yasıy

Greśiya prem’yer-ministrı Kiriakos Miśotakis çärşämbe könne Yuğarı däräcäle xezmättäşlek şurasınıñ 6 nçı cıyılışı öçen Törkiyägä säfär qıla.

 Räsmilär bu säfärne ike yaqlı mönäsäbätlärdä barlıqqa kilgän alğarışnı saqlap qalu yulında möhim adım dip bäyälilär.

Törkiyä ilbaşı idaräseneñ êlemtä bülege beldergänçä, Miśotakis Törkiyä ilbaşı Räcäp Täyyip Ärdoğannıñ çaqıruı belän Änkarağa kilä.

Cıyılışnı ike lider bergä ütkäräçäk, şulay uq  ike yaqtan da bäyläneşle ministrlar qatnaşaçaq.

Şuranıñ ike yaqlı mönäsäbätlärne centekläp küzdän kiçerüe häm xezmättäşlekne tiränäytü yullarına iğ’tibar yünältüe kötelä.

Söyläşülärdä şulay uq Törkiyä - Greśiya mönäsäbätläreneñ kiñräk strategik kontekstın çağıldıruçı regional’ häm global’ waqyğalarnıñ da qaraluı kötelä.

Soñğı yıllarda ike kürşe däwlät bigräk tä säwdä häm turizm ölkälärendä mönäsäbätlärne totrıqlılandıru häm xezmättäşlekne  kiñäytü öçen tırışlıq quya.

İke il dä ike yaqlı säwdä külämen 10 milliard dollarğa citkerergä omtıla.

Änkara belän Afina arasında başlanğan uñay kön tärtibe qısası sälamätlek saqlaw, äylänä -tirä  moxit, mädäniyät, turizm häm säwdä kebek ölkälärdä xezmättäşlekne üsterüne maqsat itep quya.

Räsmi zatlar üzara säfärlär häm östämä kileşülär aşa bu prośessnıñ tağın da tizlänüen kötä.