"Xamas" kileşüne üti, İzrail yuq"

Ärdoğan Ğazzädä xalıqara êş törkemen tözü öçen söyläşülärneñ däwam itüen belderde.

“Bu - küp qatlamlı mäs’älä, şuña kürä kiñ qırlı söyläşülär alıp barıla,” – dide ilbaşı comğa könne Küväyt, Qatar häm Omanğa säfärennän soñ oçqıçta jurnalistlar belän söyläşkändä. “Bez härtörle yärdämne kürsätergä äzer häm bezneñ äzerlek êşläre däwam itä.”

Törkiyä Ğazzädä totrıqlılıq urnaştıru häm bäreleşlärneñ tuqtaluın täêmin itü öçen xalıqara tırışlıqlarnı arttıruğa köç quya.

"Xamas" kileşüne üti, xätta bu mäs’älädä täwäkkäl buluların da açıq räweştä citkerälär. İzrail isä ütämi. AQŞ belän ber rättän xalıqara cämäğatçelekneñ İzrailneñ kileşüne tulısınça ütäwen täêmin itü öçen kübräk tırışlıq kürsätüe kiräk,” - dide ilbaşı.

Ärdoğan İzrailgä citärle däräcädä diplomatik basım yasaw zarurlığın äytep, sankśiyalär belän qoral satunı tuqtatunıñ anı üz yöklämälären cirenä citkerergä mäcbür itä ala alaçağın belderde.

Törkiyäneñ gumanitar yärdäm häm tözekländerü tırışlıqları

Ärdoğan citkergänçä Törkiyä Ğazzägä gumanitar yärdämne tuqtawsız kürsätäçäk häm suğıştan zıyan kürgän töbäkne tözekländerüdä töp rol uynayaçaq.

“Ğazzä qabat torğızılaçaq — moña berkem dä şiklänmäsen. Yärdämnärebezne Misırğa cibärep bardıq, baraçabız da,” – dide ul.

Ärdoğan Törkiyäneñ 17nçe “İgelek köymäse”neñ gumanitar yärdäm belän Misırnıñ Äl-Ariş portına citüen assızıqladı.

“Ğazzädäge qardäşlärebez härnärsägä moxtac çönki İzrailneñ varvarlarça qamalışı alarnı bar närsädän mäxrüm itte. Xäzer süz tügel, êşkä kereşergä waqıt,” – dide Ärdoğan.

Ärdoğan säfäre waqıtında Farsı qultığı illäre citäkçeläre belän Ğazzäne tözekländerü mäs’äläsen söyläşülären äytte. Küväyt, Qatar häm Omannıñ bu yünäleştä nıq häm ixlas täwäkkällek kürsätüen assızıqladı.

Ukrainadağı suğışqa da qağılğan Ärdoğan Budapeştta planlaştırılğan AQŞ–Rüsiyä oçraşuınıñ tuqtaluı turındağı xäbärlärdän soñ Törkiyäneñ Mäskäw häm Kiev citäkçelekläre arasında yaña tınıçlıq urnaştıru söyläşülären uzdırırğa äzer buluın qabatladı.

“Bu Törkiyäneñ tınıçlıq vizionınıñ möhimlegen tağın ber qat kürsätä. Bez ike yaqnıñ da ışanıçın yawladıq häm bu bezgä tınıçlıq urnaşıru öçen östenlek birä. Bez bu totışnı keşelek faydasına qullanuda täwäkkäl,” – dide ilbaşı.