Törkiyä Süriyädäge kileşüne “terrorçılıqtan arındırılğan töbäk” öçen borılış noqtası dip bäyäläde

Törkiyä İlbaşı idaräseneñ êlemtä başlığı Burhanettin Duran yäkşämbe könne Süriyädä ireşelgän "Utnı tuqtatu häm tulı integraśiyä kileşüe”n İlbaşı Räcäp Tayyip Ärdoğan ozaq waqıttan birle basım yasap kilgän "terrorçılıqtan arındırılğan töbäk"ne tözü maqsatı yulında möhim adım bularaq bäyäläde.

Duran Törkiyäneñ “NSosyal” sośial media platforması aşa urtaqlaşqan yazmasında: "Kileşü şartlarınıñ ütälüe yaqınnan küzäteläçäk”, - diyep, yäşängän täräqqiyätlärneñ oçraqlı bulmawın, İlbaşı Ärdoğannıñ yıllar däwamında äytep kilgän prinśiplarınıñ häm kisätüläreneñ çağılışı buluın belderde.

Süriyädä daimi totrıqlılıqnıñ barlıq êtnik häm dini törkemnärneñ xoquqlarınıñ tigez grajdanlıq nigezendä garantiyäläwgä bäyle buluın iskärtep uzuçı Duran: "Cir bötenlegen saqlap qalğan häm terror oyışmalarınnan çistartılğan Süriyä töbäk tınıçlığı öçen açqıç bulıp tora. Süriyä xökümäteneñ bu ölkädä yasağan adımnarı häm kürsätkän tırışuları möhim”, - dip äytte.

Törkiyäneñ häm mäydanda häm dä östäldä köçle aktyor buluına basım yasawçı Duran terror oyışmalarına qarşı operaśiyälärneñ Törkiyä çikläre buyında qurqınıçsız töbäk buldırıluına yärdäm itüen, diplomatik tırışularnıñ isä Süriyäneñ kiläçägen şäkelländergän, formalaştırğan barışlarğa bulışlıq itüen iskärtep uzdı.

Duran: "Süriyäneñ cir bötenlege häm suverenlığı Törkiyä öçen alıştırğısızdır”, diyep, Änkaranıñ kürşeseneñ iminlegen üz iminlegennän ayırmawın, tınıçlıqnı prinśip, totrıqlılıqnı isä maqsat dip qabul itüen belderde.