Ali Hamaney protestlarnı ğayepläde

Comğa könne İrannıñ iñ yuğarı liderı Ali Hamaney ildä çıqqan iñ zur protest çaraları qarşında kiregä adım yasamayaçağın assızıqladı. Räsmi zatlar distälägän keşeneñ ğomeren özgän operaŝiya qısalarında internetnı özde.

İqtisad häm tormış şartlarınıñ naçarayuı kiterep ığarğan çaralar 13 kön rättän il külämendä däwam itä. Protestçılar 1979 yldan xakimiyättä bulğan dini sistemanı beterergä çaqıra.

İnternetnı küzätü oyışması “Netblocks” beldergänçä räsmi zatlar soñğı 24 säğät däwamında böten ildä internetnı özde. Monıñ İran xalqınıñ xoquqların bozuın, rejımnıñ qırıslıqnı yäşerüen citkerde.

Norvegiya nigezle "Iran Human Rights" isemle ictimağıy oyışması iminlek köçläreneñ kim digändä 51 demonstrantnı üterüen häm yözlärçä keşene yaralawın xäbär itte. Ülüçelärdän tuğızı – 18 yäştän keçkenä.

Êkspertlar demonstraŝiyälärneñ İrandağı rejım yaqınça 45 yıllıq tarixında oçraşqan iñ zur köç kürsätülärneñ berse buluın belderä.

“Vandallar häm sabotajçılar”

Dini lider Hamaney 3 ğıynwardan birle baruçı protestlar turında bederü yasap, protestçılarnı vandallar häm sabotajcılar dip atadı. Hamaney AQŞ ilbaşı Donald Tramp qullarına meñnän artıq İranlınıñ qanı buyaluın äytte.

Tramp pänceşämbe kiçke sägätlärdä: “Ul rejimnı bärep töşerü teläge ğacäyep zur,” – dide häm İran räsmi zatları protestçılarnı ütergän oçraqta waqıyğalarğa qırıs räweştä qatışaçaqları turında kisätte.

1979 yılğı inqıylaptan soñ sörgendä ülgän Şah Möxämmäd Rıza Pählävineñ ulı Rıza Pählävi İrandağı protestlar däwam itkändä AQŞ ilbaşı Trampnı aşığıç räweştä qatışırğa çaqırdı.

“Xörmätle, ilbaşı! Bu - sezneñ iğtibarığıznı, yärdämegez häm qatışuığıznı taläp itüçe aşığıç çaqıru. Zinhar, İran xalqına yärdäm itär öçen qatışırğa äzer bulığız!” – dide ul.

Vaşingtonda yäşäwçe Pählävi nindi qatışu kötüen açıqlamadı läkin internetnı özü häm protestçılarğa qarata köç qullanu qurqınıçına işarät itte.

Mäxkämä xakimiyäte başlığı Gulam Xösäyen Muhsini Edjei ğıysyançılarğa qatğıy häm iñ awır cäzanıñ bireläçäge, bernindi xoquqıy yul quyunıñ bulmayaçağı turında kisätte.