İndoneziyada 61 keşe ülgän işelü faciğasında êzläw-qotqaru êşläre tögällände
Xaräbälär astında buluı açıqlanğan barlıq qorbannar çığarılğannan soñ Könçığış Yavadağı internat-mäktäptä êzläw häm qotqaru operaśiyäse tuqtatıldı.
“Indoneziyada qotqaruçılar sişämbe könne Könçığış Yava vilayätendä cimerelgän İslam mädräsäse astında qalğan qorbannarnı êzläw êşlären tämamladı häm 60tan artıq mäyet tabıldı”, dip xäbär itte ğadättän tış xällär idaräçeläre.
Ütkän atnada Äl-Xozini mädräsäse, nigezläre zäğıyf buluı säbäple, cimerelgäç, Sidoarjo şähärendä yäşäwçelär qayğığa çumdı. İşelü mizgelendä anda yözlärçä keşe bula, kübese yäşüsmer ir balalar. Alar köndezge namazğa basqan çaq bula.
Küpçelek qaçıp qotıla alğan.
Bina êçendäge 61 keşeneñ mäyetläre, şulay uq, 7 gäwdä öleşe dä tabılğan, alarnı politsiyä tanırğa tırışa. Şunıñ belän yılnıñ iñ ülemçel faciğası dip atalğan waqıyğada êzläw eşläre tuqtatıldı.
“Äl-Xozini mädräsäse cimerelüe säbäple başqarılğan operatsiyälär ... räsmi räweştä tämamlandı,” dip belderde qotqaru agentlığı citäkçese Möxämmäd Şäfii.
Agentlıq citäkçeseneñ urınbasarı Budi İrawan äytüençä, tabılğan gäwdä öleşläre arasında ayırılğan äğzalar da bar.
Qotqaruçılar zur betonnı kütärü öçen êkskavatorlar häm krannar qullandı. Tunnel aşa qazıp, alar äle isän bulırğa mömkin qorbannar isemnären qıçqırıp êzläde.
“Äl-Xozini” mädräsäse ildäge 42 meñnän artıq şundıy mädräsälärneñ berse, alar “pesantren” dip atala. Tik şularnıñ 50se genä räsmi tözü röxsätenä iyä, dip belderde cämäğät êşläre ministrlığı.
“Reuters” “Äl-Xozini” mädräsäseneñ röxsäte bulu-bulmawın açıqlıy almadı häm mädräsä xakimiyätläre belän êlemtägä kerä almadı.