Dominikan narkotiklarğa qarşı köräş öçen AQŞqa üz territoriyäsen qullanırğa röxsät itte
AQŞ köçläre çikle waqıt aralağında ike töbäktä êşçänlek alıp bara alaçaq.
Dominikan ilbaşı Luis Abinader, AQŞqa Karib diñgezendä narkotrafikka qarşı köräşü operatsiyälärenä yärdäm itü maqsatında, üz ileneñ territoriyasen "waqıtlıça" qullanu röxsäte birde.
Abinader çärşämbe könne Santo-Domingoğa kilgän AQŞ saqlanu ministrı Pit Xegset belän uzdırılğan matbuğat konferentsiyäsendä: "Bez AQŞqa San Isidro hawa bazası häm Las-Amerikas xalıqara aêroportınıñ bilgele zonaların oçqıçlarğa yağulıq salu, cihazlar häm texnik personalnı küçerü öçen logistika maqsatında qullanırğa waqıtlıça röxsät birdek," — dip äytte.
Bu belderü Pentagonnıñ Karib diñgeze häm Tın okeanda narkotik taşu belän şöğıllänüe uylanıluçı köymärlärgä yünältelgän höcümnäre dulqınınnan soñ kilä. AQŞ köçläre sentyabrdan birle 20dän artıq höcüm oyıştırdı, näticädä, kimendä 83 keşe ülde.
"Maqsat açıq: qorallı köçlärebeneñ hawa häm diñgez saq çeltären nığıtu, şulay itep narkotiklarnıñ kerüen kirtäläw öçen kübräk köç tuplaw häm xalıqara oyışqan cinayätçelekkä tağın da täêsirle bärü," — dip äytte Abinader.
Soñınnan Pit Xegset jurnalistlarga AQŞnıñ narkoterrorçılarnı êzärlekläp êläkteräçäge turında söyläde.
"Çiklärebez - Dominikannıqı bulsın, AQŞnıqı bulsın — imin bulaçaq häm bez monı ğamälgä aşırır öçen partnerlarıbız belän bergä êşlärgä ömetlänäbez," — dip östäde ul, häm ilbaşı Donald Trampnıñ AQŞqa narkotik kiterergä teläwçe narkotrafikçılar belän köräştä "citdi" buluın da assızıqladı.