Vaşington Karakastağı waqıtlıça xökümätkä säyäsi totqınnarnı irekkä cibärü buyınça basım yasawnı däwam itkändä, Venesuêla oppozitsiyäse wäkile Mariya Korina Maçadonıñ bu atnada AQŞ ilbaşı Donald Tramp belän oçraşaçağı xäbär itelde.
Maçado, 3 ğıynvarda AQŞ köçläre Nikolás Maduronı urlap kitkännän soñ, Vaşington tarafınnan çitkä tibärelde häm Tramp xökümäte Venesuêlanı üze "idarä itäçägen" iğlan itte.
Venesuêla oppozitsiyäse wäkile Mariya Korina Maçado häm anıñ yardämçese Êdmundo Gonsales Urrutianı iğtibarsız qaldırğan Tramp, monıñ urınına waqıtlıça ilbaşı Delsi Rodriges häm Maduro xökümätennän qalğan başqa räsmi zatlar belän xezmättäşlek itä.
Tramp Rodrigesnı Vaşingtonnıñ, bigräk tä, Venesuêlanıñ zur neft' rezervlarına kerü röxsäte mäs'äläsendäge taläplärenä buysınırğa kiräklege, yuqsa monıñ näticäläre belän oçraşaçağı turında kisätte.
AQŞ xökümätennän ber räsmi zat cömhüriyätçe ilbaşınıñ pänceşämbe könne Aq Yortta Maçado belän oçraşaçağın äytte.
Bu arada Venesuêla Maduro waqıtında törmägä yabılğan tağın 116 keşene irekkä cibärüen iğlan itte. Bu keşelärneñ küpçelege bäxäsle 2024nçe yılğı saylawlardan soñğı protestlarda qatnaşuları öçen qulğa alınğan.
Maçado düşämbe könü Papa 14nçe Leodan totqınnar isemennän "aradaşçı buluın" soradı.
Mariya Korina Maçado Vatikanda Papa belän oçraşqannan soñ: "Annan urlanğan häm yuğalğan barlıq venesuêlalılar öçen aradaşçı buluın soradım", — dide.
Maçadonıñ kandidatlıq xoquqı ğamäldän çığarılğannan soñ, 2024 yılğı saylawlarda oppozitsiyäneñ ilbaşı kandidatı bularaq yarışqan Gonsales Urrutia: "Uzğan här säğät — totqınnarnıñ ğailälärenä qarata yaña ber zolım töre", — dip belderde.
Delsi Rodriges, Maduronıñ tuğrı berlektäşe buluına qaramastan, Venesuêlanıñ zur neft' rezervlarınnan faydalanu maqsatındağı Vaşington belän söyläşülär alıp bara.
AQŞ ilçeläre, diplomatik bäyläneşlär özelgängä cide yıl tulğannan soñ, Vaşingtonnıñ Karakastağı ilçelegen yañadan açu turında söyläşü öçen uzğan atnada şähärgä kilde.
Tramp yäkşämbe könne Rodriges belän oçraşuğa açıq buluın häm üz xökümäteneñ anıñ idäräse belän "çınlap ta yaxşı" êşläwen äytte.
Donald Tramp, şulay uq, irekkä cibärelgän totqınnarnıñ "AQŞ kilep tiyeşle êşne başqarğanı öçen niqadär bäxetle buluların xäterläyäçäklärenä" ömetlänüen belderde.
Uzğan yıl Nobel' Tınıçlıq bülägenä alğan Maçado, ciñüen bu büläkkä layıq kürelmäwe säbäple ömetsezlegen yäşermägän Trampqa bağışlağan ide.
