Kanada turistı Avstraliyädä dingo êtläre belän çolğanıp alınğan xäldä üle kileş tabıldı
Politsiyä 19 yäş’lek xatın-qızğa Kvinslend yar buyındağı K’gari utrawında yörüçe qırğıy êtlär — dingolarnıñ höcüm itü-itmäwen yäki suda batu-batmawın tikşerä.
Avstraliya politsiyäse Kvinslend töbägendäge plyajda tabılğan kanadalı turistnıñ suğa batıp ülgänme yäki älege ilgä xas dingolar törkeme höcüm itkänme ikänen tikşerä.
Politsiyä äytkänçä, 19 yäşlek xatın-qız Kvinslend yar buyında urnaşqan K'gari utrawında su qoyınırğa baruın duslarına äytep kitkännän soñ düşämbe könne üle kileş tabılğan.
Kvinslend politsiyä inspektorı Pol Alji matbuğat konferentsiyäsendä bolay dip äytte: "Xäzerge waqıtta yäş’ xatın-qıznıñ niçek hälak buluın tögäl genä äytergä irtä. Bez barlıq mömkinleklärne tikşeräbez." Alji xatın-qıznıñ şäxesenä bäyle täfsille mäğlümat birmäde. Politsiyä inspektorı: "Yar buyınnan baruçı keşelär dingo törkemen kürep tuqtağan. Dingolarnı qurqıtıp quğannan soñ yäş’ xatın-qıznıñ üle gäwdäsenä tap bulğannar," — dip östäde.
Ştatnıñ tirä-yünne saqlaw ministrlığı utrawda irekle yörüçe qırğıy êtlärneñ keşelär belän êlemtäläre artuı säbäple qıyuraq bula başlawların belderde. Bu êtlärneñ keşelärne yaralaw, xätta balalarğa kilgändä, siräk bulsa da üterü sälätenä iyä ikännäre bilgele.