“Urlanğan uquçılar qotqarıldı”

Nigeriyädä uzğan ay qorallı törkemnär tarafınnan mäktäptän urlangan yaqınça 130 uquçı häm xezmätkär azat itelgän.

21 noyabr’dä ilneñ tön’yaq-üzäk öleşendäge Niger ştatında  mäktäpkä oyıştırılğan höcümdä kim digändä 303 uquçı häm 12 uqıtuçı urlangan ide.

Waqıyğadan soñ berençe säğat’lärdä 50 keşe qaça alğan, ä bu ay başında isä 100 uquçı azat itelgän ide.

Niger ştatı poliśiyäse süzçese Wasiu Abiodun yäkşämbe könne yasağan belderüendä, xezmätkärlärne dä kertep, barlığı 130 keşeneñ irekkä cibärelüen citkerde.

Yugalğan dip sanalğan  35 uquçı häm uqıtuçı turındağı sorawğa isä “Centekle mäğ’lümat soñraq citkereläçäk” dip cawap birde.

Läkin BMO çığanağı “AFP”ğa yasağan belderüendä urlanğan dip sanalgan distälägän keşeneñ çınında höcüm waqıtında qaçıp öylärenä qaytuların, şuña kürä urlanğan  härkemneñ azat itelgän kebek kürenüen citkerde.

Çığanaq balalarnıñ yortları awıl cirlärendä bulğanğa häm awıllarğa mototsikl belän barıp citü öçen säğat’lär kiräk bulğanğa tögäl sannı bilgeläwneñ awır buluın belderde.

Raştuadan êlek öylärendä bulaçaqlar

İlbaşı idaräse süzçese Bayo Onanuga X platformasında yasağan belderüendä uquçılarnıñ düşämbe könne ştat başqalası Minnağa kiläçäklären häm Raştuada ğailäläre yanında bulaçaqların belderde.  

Onanuga: “Uquçılarnıñ irege xärbi küzläwgä nigezlängän operaśiya näticäsendä täêmin itelde”,-dide.  

İlbaşı Bola Tinubunıñ tağın ber süzçese Sunday Dare dä äsirlektä berkemneñ dä qalmawın rasladı.

Höcüm öçen cawaplılıqnı ber törkem dä üz östenä almasa da,  cirle xalıq Nigeriyäneñ tön’yağında yolım alu öçen mäktäplärne häm yulçılarnı nişan itep alğan qorallı bandalarnı cawaplı tota.

 Bu soñğı kümäk urlaw kürşe Kebbi ştatında 25 uquçu urlanğannan son 4 kön ütkäç buldı.