AQŞ üz watandaşların İrannı xäzer ük taşlap kitärgä çağırdı

AQŞnıñ İrandağı virtual' ilçelege, il külämendäge tärtipsezleklärneñ artuı säbäple, düşämbe könne Amerika watandaşların, waqıt sarıf itmiçä, ilne taşlap kitärgä çaqırıp kisätte.

Bastırılğan iminlek kisätüendä ilçelek: “İrannı xäzer ük taşlap kitegez”, — dip, watandaşlarınnan AQŞ xökümätennän yärdäm almıyça İrannan kitüne planlawların sorıy. Kisätüdä, şulay uq: “Ägär kitä almıysız ikän, yäşägän urınığızda yäki imin başqa ber binada saqlanu urını tabığız”, — diyelgän.

Kiñäş qararında İrandağı AQŞ watandaşlarınıñ däwam itüçe internet özekleklärenä äzer buluları, alternativ êlemtä yulları planlawları häm “ägär imin bulsa, qorı cir yulı belän Ärmänstan yäki Törkiyägä küçep, İrannan kitü ixtimalın qarawları” sorala.

İran-AQŞ ikele watandaşlarınıñ İrannan İran pasportları belän çığarğa tiyeşlege belderelgän açıqlawda; İran xökümäteneñ ikele watandaşlıqnı tanımawı häm bu keşelärgä fäqat İran watandaşı itep qarayaçağı iskärtelde. Monnan tış: “AQŞ pasportın kürsätü yäki Amerika Quşma Ştatları belän bäyläneşne açıqlaw İran räsmi zatlarına qulğa alu öçen citärlek säbäp bulırğa mömkin”, — diyelde.

Tramp xökümäte İranğa qarşı xärbi häm yäşeren çaralarnı qararğa cıyına

Düşämbe könne AQŞ ilbaşı Donald Tramp, xökümätkä qarşı protestlarnı bastıru däwam itkändä, İran belän êş itüçe “härtörle” ilgä 25% tamğaxanä salımı kerteläçägen iğlan itte.

Tramp, İran räsmi zatlarınıñ protestlarnı bastıru öçen ülemgä kiterüçe köç qullanğan oçraqta, höcüm itü belän berniçä tapqır yanasa da, Tähran belän diplomatiyä mömkinleklären qararğa äzerlegen dä belderde.

Kilep ireşkän xäbärlärgä qarağanda, Trampqa räsmi xärbi hawa höcümnäre belän berrättän, İranğa qarşı xäräkät itü öçen törle variantlar täqdim itelä. “CBS News” xäbärenä kürä, kiñ qolaçlı xärbi häm yäşeren çaralar İrannıñ komanda strukturaların, êlemtäsen häm däwlät mediasın qaqşatuğa yünältelgän kiber operatsiyä variantların häm psixologik kampaniyalarnı üz êçenä ala.

İke Pentagon räsmi zatı süzlärenä sıltawçı xäbärdä kiber häm psixologik operatsiyälärneñ ayırım yäki ber ük waqıtta ğamälgä kertelä aluı, läkin älegä soñğı qararnıñ qabul itelmäwe äytelde. Şulay uq, Trampnıñ milli iminlek komandasınıñ sişämbe könne Aq Yortta İranğa qarşı variantlar turında fiker alışuı kötelä.

Tramp yäkşämbe könge belderüendä, xökümäteneñ İrandağı wäzğiyätne yaqınnan küzätüen häm, protestlarda ülüçelär sanı artuı säbäple, “bik köçle çaralarnı” qarawın äytte. Tramp, AQŞnıñ qayçan, qayda yäki niçek xäräkät itäçäge turında mäğlümat birmäde, “Ber qararğa kiläçäkbez”, — dide häm İran turında säğat sayın xisap aluın östäde.