Ärdoğan: “Sez – Törkiyäneñ kiläçäge”

Törkiyä ilbaşı Räcäp Täyyip Ärdoğan yäş’ tamaşaçılarğa yünältelgän yaña televideniye kanalı “TRT Genç” ne (TRT Yäş’lär) açu tantanasında qatnaştı.

Pänceşämbe könne Beştepe Millät kongress häm mädäniyat üzägendä yäş’lärgä, media wäkillärenä häm qunaqlarğa möräcäğat’ itep çığış yasağan Ärdoğan yäş’lärne millät yortında qabul itüenä şat buluın belderde häm alarnı Törkiyä­neñ kiläçäge dip atadı.

TRT xezmätkärlären täbrik itkän Ärdoğan yaña kanalnıñ yäş’lärgä, ğailälärgä, media tarmağına häm böten millätkä fayda kiteräçägen belderde häm alarğa uñışlar teläde.

Ärdoğan “TRT Genç” kanalınıñ  fän­nän texnologiyägä, mädäniyat-sänğat’tän sportqa, tarixtan kön­dälek tormışqa qadär törle temalarnı yaqtırtqan  tapşıruları belän yäş’lärneñ psixik, êmośional’ häm mädäni üseşenä yärdäm itäçägen äytte.

Ul şulay uq mondıy platformalarnıñ zamanıbıznıñ çuması bulğan bäylelekkä qarşı köräştä möhimlegen assızıqlap, ayıruça êkranğa bäylelekneñ, qomarlı uyınnar häm narkomaniyäneñ sizelerlek artuın belderde.

Çarada çığış yasağan Törkiyä teleradiokompaniyäse TRT ğomum mödire Mäxmät Zahid Sobacı balalar tapşıruları belän ölkannär tapşıruları arasında qalğan, üzlärenä oşağan häm yuğarı sıyfatlı êkran êzlägän yäş’lärgä däwlät garantiyäsе, millät qıymmätläre häm śivilizaśiya däğ’wası belän suğarılğan “TRT Genç” kanalın täq’dim itülären äytte.

Sobacı “TRT Genç” kanalınıñ ata-analar öçen dä qızıqlı bulaçağın, ğailälär bergäläp qarıy, bergä öyränä häm mönäsäbätlärne nığıta alaçaq ışanıçlı platforma bulaçağın assızıqladı.

“Bez yäş’lärebezgä ürnäk bulaçaq şäxeslär täq’dim itep, alarda “Min dä êşli alam, min dä buldıram” digän xis uyataçaqbız”,- dide ul.