Trampnıñ Qıtayğa säfäre ikençe tapqır kiçekterelde

AQŞ ilbaşı Donald Tramp İran suğışı arqasında monnan alda planlaştırılğan oçraşunı kiçektergännän soñ may ayında Pekinda Qıtay liderı Si Cinpiñ belän küreşäçägen belderde.

Tramp çärşämbe könne yasağan açıqlawında mart ayı axırında planlaştırılğan bu tarixi säfärne tüzemsezlek belän kötüen häm Si belän xäläl cefeten bu yılnıñ axırında Vaşingtonda qunaq itäçägen äytte.

Tramp üzeneñ “Truth Social” çeltärendä: "İrandanğı xärbi operaśiäbez säbäple kiçekterelgän Qıtaynıñ xörmätle ilbaşı Si Cinpiñ belän oçraşuıbız yañadan planlaştırıldı häm 14–15 may könnärendä Pekinda uzaçaq," — dip yazdı.

Tramp AQŞ häm Qıtay räsmi zatlarınıñ bu tarixi Pekin häm Vaşington säfärläre öçen äzerleklärne tämamlawın belderep: "İlbaşı Si belän bergä ütkäräçäk waqıtımnı tüzemsezlek belän kötäm, bik möhim waqıyğa bulaçağına ışanam," — dip östäde.

Aq Yort, Trampnıñ sośial' mediadağı yazmasınnan alda oçraşu könnären citkergän ide.

Tramp, dönyanıñ iñ zur ike iqtisadı arasındağı säwdä bäyläneşlären yañadan tärtipkä salunı maqsat itkän sammit öçen, ikençe ilbaşı çorında berençe tapqır 31 mart belän aprel ayları arasında Pekinğa barırğa planlaştıra ide.

Läkin Tramp, iğtibarınıñ 16 martta İran belän däwam itkän suğışqa yünälüen äytep, Qıtaydan oçraşunı kiçekterüen sorağan ide.

Tramp ul waqıtta jurnalistlarğa: "Suğış arqasında monda bulırğa telim, biredä bulırğa tiyeş min, şunı sizäm. Şuña kürä ber ayğa kiçekterüne talep ittek," — digän ide.

Tramp Qıtayğa soñğı tapqır 2017 yılda bardı. Bu - AQŞ liderı Qıtayğa yasagan soñğı säfär buldı. Trampnıñ planlaştırılğan säfäre, liderlar oktäbr ayında Kön’yaq Koreyada säwdä kileşüen täêmin itkän oçraşularınnan soñ berençe küzgä-küz küreşüläre bulaçaq.