Ärdoğan Päzäşkiyan belän söyläşüendä Törkiyäneñ İranğa çit il tıqşınuına qarşı buluın äytte

İlbaşı Räcäp Tayyip Ärdoğan atnakiçen İran Däwlät başlığı Mäsud Päzäşkiyan belän ütkärgän telefon söyläşüendä Törkiyäneñ İranğa härtörle çit il tıqşınuına qarşı buluın häm kürşeläreneñ tınıçlığı belän totrıqlılığına ähämiyät birüen äytte. Belderü İlbaşı idaräse tarafınnan “X" aşa yasaldı.

İlbaşı idaräse belderüendä söyläşü waqıtında İrandağı soñğı täräqqiyätlärneñ quzğatıluı turında äytelde. Ärdoğannıñ problemalarnıñ yaña ber kiyerenkelekkä yul açmıyça xäl itelüeneñ Törkiyä mänfäğätlärenä turı kilüen citkerüe iskärtelep uzıldı.

İran xökümätkä qarşı soñğı yıllarnıñ iñ zur rizasızlıq çaraları belän tetränä. Protestlarğa qarşı kiñqolaçlı iminlek operaśiyälärennän soñ ilneñ dini liderı Äli Xamänäy şimbä könne yasağan belderüendä waqiğalarda “berniçä meñ” keşeneñ häläq buluın äytte. Bu İran räsmiyeneñ qorbannar sanı turındağı berençe açıq raslawı buldı. Xamänäy ülemnärdän Amerika Quşma Ştatların cawaplı tottı.

Başta iqtisadi qıyınlıqlar arqasında başlanğan protestlar häm êş taşlaw çaraları 1979nçı yılğı inqilabtan birle ilne idarä itüçe dini liderlıqqa qarşı massaküläm xäräkätkä äylände. 8nçe ğinwardan birle könnär buyı däwam itüçe uram cıyınnarında yözlärçä meñ keşe uramnarğa çıqtı.

Çärşämbe könne İran tışqı êşlär ministrı, Waşingtonğa qarata moña qadärge iñ kisken kisätüen yasap, İslam Cömhüriyäteneñ “yañadan höcümgä duçar bulğan oçraqta böten mömkinlekläre belän cawap biräçägen” äytte.

Şul uq könne räsmi zatlar berençe räsmi sannarnı açıqladı. Däwlät televideniyäse citkergänçä, İran veterannar häm şähitlär waqıfı protestlar waqıtında 3 meñ 117 keşeneñ häläq buluın belderde.