"Netanyaxu belän räsemgä töşärgä telämilär"

Törkiyä tışqı êşlär ministrı Xaqan Fidan Netanyaxunıñ agressiv xärbi säyäsätlär alıp barğanı öçen ilen tağın da kübräk izolyaśiyaläwen äytte.

Pänceşämbe könne İstanbulda jurnalistlarğa belderü yasağan ministr xäzerge şartlarda İzrail belän mönäsäbätlärneñ cayğa salınuınıñ Törkiyä öçen genä tügel, dönyanıñ şaqtıy ile öçen dä mömkin bulmawın citkerde.

Xaqan Fidan İzrailneñ haman da däwam itüçe xärbi xäräkätenä basım yasap: “Bu däwam itkän sayın bezneñ öçen genä tügel, şaqtıy il öçen dä İzrail belän mönäsäbätlärne cayğa salu mömkin bulıp kürenmi,” – dide.

Fidan Awrupalı liderlarnıñ Netanyaxu belän cämäğatçelek aldında mönäsäbät qorırğa telämäwenä iğtibarnı cälep itep, bik äzeneñ, xätta berkemneñ dä İzrailgä säfär yasarğa yäisä premyer-ministr belän bergä räsemgä töşärgä telämäwen citkerde.

Tışqı êşlär ministrı Fidan, İzrailgä qarşı kürsätelgän distanśiyale mönäsäbätne ilneñ artuçı diplomatik yalğızlığınıñ ber dälile dip atadı. Netanyaxunıñ Amerika Quşma Ştatlarınnan tış bışqa bernindi ilgä barmawın açıqlağan Fidan, xättä yaqın berlektäşläreneñ dä könnän-kön sağraq êş başqaruın alğa sörde.

“Netanyaxu Amerikadan başqa illärgä bara alamı? Bara almıy. Bälki Greśiyağa,” – dide ul.

Fidan qayber illärneñ İzrailgä qarşı buluların açıqtan-açıq belderüen, başqalarınıñ isä yuğarı däräcäle säfärlärdän häm simvolik jestlardan taypılıp, cämäğatçelekkä belderü yasamıyça, tınıç qına yıraqlaşunı saylawın äytte.