İndoneziya: Ğazzä tınıçlıq köçläre 20 meñ ğaskäridän torırğa mömkin

İndoneziya ilbaşı Prabowo Subiantonıñ wäkile sişämbe könne Ğazzä öçen täqdim itelgän küpmillätle tınıçlıq saqlaw köçläre yaqınça 20 000 ğäskäridän torırğa mömkin, İndoneziya yaqınça 8000 ğaskär cibärergä mömkin dip belderde.

Şulay da, wäkil älegä urnaştıru şartları yaki êşçänlek ölkäläre turında kileşügä ireşelmäwen assızıqladı.

Prabowo bu ay axırında Vaşingtonğa ilbaşı Donald Trampnıñ Tınıçlıq şurasınıñ berençe utırışına çaqırıldı.

Könçığış Aziyada urnaşqan İndoneziya uzğan yıl Ğazzä tınıçlıq saqlaw köçlärenä 20 000 ğaskäri cibärärgä wäğdä birde, läkin urnaştırunı raslar aldınnan köçlärneñ wäqaläte turında östämä mäğlümat kötüen äytte.

İlbaşı wäkile Prasetyo Hadi sişämbe könne jurnalistlarğa: "Barlığı 20 000 (illär buyınça) yaqınça... bu İndoneziya ğına tügel", - dip belderde häm ğaskärlär sanı äle tögäl açıqlanmawın, läkin İndoneziyanıñ yaqınça 8000 ğaskäri cibärä aluın östäde.

Prasetyo Hadi: "Bez kileşügä ireşelgän häm bezgä tınıçlıq saqlaw köçläre cibärergä kiräk bulğan oçraq öçen äzerlänäbez", - dide.

Şulay uq, süzçe İndoneziyanıñ Tınıçlıq şurasında daimi äğzalık öçen kiräkle 1 milliard dollarnı tülär aldınnan söyläşülär ütkäräçägen äytte.

İndoneziya saqlanu ministrlığı, şulay uq, İzrail matbuğat çaralarında İndoneziya ğaskärläreneñ Ğazzäneñ Rafax häm Xan Yunıs rayonnarına urnaştırılaçaq digän xäbärne kire qaqtı.

“Reuters” agentlığına cibärelgän xäbärdä saqlanu ministrlığı süzçese Riko Rikardo Sirat bolay di: "İndoneziyanıñ Ğazzädä tınıçlıqqa häm gumanitar yärdämgä öleş kertü plannarı äle äzerlek häm koordinatsiyaläw êtabında. Operativ mäśälälär (çibärü urını, personel sanı, programma, mexanizm) älegä tögällänmägän häm räsmi qarar qabul itelgännän häm kiräkle xalıqara röxsät açıqlangannan soñ iğlan iteläçäk".