AQŞ säyäxät tıyuın 30dan artıq ilgä kiñäytä ala
AQŞnıñ iminlek ministrı Kristi Noêm Trampnıñ säyäxät tıyuın kiñäytergä uylawın citkerde
Kristi Noêm pänceşämbe könne belderü yasap, Aq Yort yanında barlıqqa kilgän häm ber Äfğanstan watandaşı qarışqan qorallı höcümnän soñ Tramp citäkçelegeneñ säyäxät tıyuın 30dan artıq ilgä kiñäytergä uylawın äytte.
Noêm “Fox News”ka birgän intervyuda: “Sannı tögäl äytmim läkin 30dan artıq il bar. İlbaşı bu illärne bäyäläwen däwam itä,” – diyep, totrıqlı xökümätläre bulmağan illärdän kilüçelärgä kerü röxsäten birmäw zarurlığın citkerde.
Noêmnıñ bu süzläre atna başında yasağan köçle belderüeneñ däwamı bulıp tora. Ul aldağı belderüendä “ilebezne keşe üterüçelär, yök bulıp toruçılar häm däwamlı östenlek êzläwçelär belän tutıruçı här mälğun ilgä tulı säyäxät tıyu”nı täqdim itte.
Çikläwlärne kiñäytü iniśiativaları Tramp 28 noyabr könne öçençe dönya illärennän migraśiyane tuqtatu kisätüen yasağannan soñ başqarıldı.
Donald Tramp isä belderüen 26 noyabrdä Aq Yort yanındağı qorallı höcümdä milli saqçınıñ ülüennän häm ikençe saqçınıñ yaralanuınnan soñ yasadı.
AQŞ 2021 yılda Qabulnı êvakuaśiyalägändä Amerikağa kergän häm apreldä sıyınu alğan 29 yäşlek ber Äfğanstan watandaşı bulğan şöbhäle keşe AQŞ matbuğatına kürä monnan alda ŚRU belän ber rättän Amerika xökümäte agentlığı belän êş başqardı.
Höcümnän soñ Äfğanstanğa birelüçe vizalar häm sıyınu röxsätläre şunduq tuqtadı.