Grenlandiya häm Antarktikada 1979 yıldan birle 12 trillion yarım tonna boz êregän.

AQŞta "Scientific Data" isemle jurnalda bastırılğan tikşerenüdä dönyanıñ iñ zur ike boz massası — Grenlandiya häm Antarktikadağı boz êrülär küzätelde.

1979 yıldan birle bu ike töbäktä 12 trillion yarım tonna boz êregän. Tikşerenüçelär äytüençä, bu san AQŞnıñ östen yaqınça metr yarım qalınlıqta boz qatlamı belän qaplarğa citä torğan külämdä.

Bu êrügä kübräk êsselek tügel, ä cılı sular säbäpçe bulğan häm êregän boz massaları okean sularına quşılğan.

Diñgez däräcäsendäge 1 santimetrlık artu — 2-3 million keşe öçen su basu qurqınıçı tudıra

Tikşerenü turında yazğan Kaliforniya universitetınnan Êrik Rignot tübändäge kisätüne yasadı: "Boz qatlamnarı tizlek belän êri. Bez qotıp töbäklären êretäbez, diñgez däräcäse böten dönyada kütärelä häm bu yar buyı töbäkläreneñ saqlanuın tağın da naçaraytaçaq."

Tikşerenü turında yazğan Nortumbriya universitetınnan İnes Otosaka da diñgez däräcäsendäge här 1 santimetr artunıñ yılına 2—3 million keşe öçen su basu qurqınıçı tudıruına basım yasadı.

Yazuçılardan Êndryu Şefard äytüençä, 1970nçe, 80nçe häm 90nçı yıllarda boz qatlamnarı totırıqlı torışta ide läkin töp êrü 2010nçı yıllarda başladı.

Tikşerenü komandası bu näticälärne çığaru öçen 27 törle küzätü iyärçene häm 45 bäysez tikşerenüne qarap çıqtı.