Mayami söyläşüläre yaqınlaşqanda Tramp Kiyevqa tiz xäräkät itü öçen basım yasıy
AQŞ aradaşçılığında alıp barılğan söyläşülär kritik êtapqa kergändä Vaşington tüzemsezlek kürsätä, ä Mäskäw isä qatğıy taläplärendä nıq tora.
AQŞ ilbaşı Donal’d Tramp pänceşämbe könne Ukrainanı Rusiya belän suğışnı tuqtatırğa mömkin bulğan kileşüdä tiz xäräkät itärgä çaqırdı häm yaña söyläşülär yaqınlaşqanda totqarlıqlar Mäskäwneñ poziśiyäsen tağın kiskenläşterergä mömkin dip kisätte.
Oval ofista jurnalistlar aldında çığış yasağan Tramp, söyläşülärneñ borılış noqtasına yaqınlaşuın äytep, Kiyevnıñ tiz xäräkät itärgä kiräklegenä basım yasap bolay dide: “Närsäder bulaçaq kebek, läkin min Ukraina tiz xäräkät itär dip ömetlänäm. Alar artıq küp waqıt äräm itkändä, Rusiya üz fikeren üzgärtä”.
Bu süzlär bu atna axırında Mayamida AQŞ häm Ukraina räsmi zatları arasında suğışnı tuqtatuğa yünältelgän täq’dimnär proyektın tikşerü öçen ütkärelergä tiyeşle yuğarı däräcäle oçraşular aldınnan äytelde.
Mayami söyläşüläre başlana
Aq Yort wäqalätlese süzlärenä qarağanda, AQŞnıñ maxsus ilçese Stiv Vitkoff häm Trampnıñ kiyäwе Djared Kuşner Floridada Ukraina söyläşüçese Rustem Umerov belän oçraşaçaq.
Ukraina däwlät başlığı Volodimir Zelenskiy êlegräk Kiyev delegaśiyäseneñ comğa häm şimbä könnärendä AQŞtağı wazıyfadaşları belän söyläşülär ütkäräçägen raslağan ide.
Şulay uq AQŞ räsmiläreneñ Rusiya wäkilläre belän ayırım oçraşular ütkärüe dä kötelä. “Politico” xäbär itüençä, Rusiya ilbaşı Vladimir Putinnıñ ölkän iq’tisadi wäkile Kirill Dmitriev Mäskäw delegaśiyäse sostavında bulaçaq.
Diplomatik yaqtan alğa kiteş bulsa da, töp’ mäs’älälärdä bernärsä dä üzgärmäde.
Rusiyä älegä soñğı täq’dimnärgä cämäğat’çelek aldında cawap birmäde, Putin Mäskäwneñ maksimalist xärbi maqsatların däwam itüne niyätläwen qat-qat belderde.
Vaşington häm Kiyev Ukraina öçen kiläçäktäge iminlek garantiyäläre mäs’äläsendä alğa kiteş buluın äytsä dä, Rusiyäneñ kileşü qsalarında taläp itkän territorial’ taşlamalar mäs’äläsendä tirän qarşılıqlar däwam itä.