AQŞ Ormuz buğazın açırğa çaqırıp qabat kisätte
AQŞ ilbaşı Tramp, Ormuz buğazı yañadan açılmağan oçraqta, ênergiyä häm su asqormasına yünältelgän höcümnär belän yanadı, şul uq waqıtta, İran belän söyläşülärdä alğarışqa ireşelüen alğa sörde.
İlbaşı Donald Tramp, AQŞnıñ İran belän suğışnı tuqtatu öçen "tağın da mantıyqlı rejim" belän söyläşülär alıp baruın äytte, läkin Tähranğa Ormuz buğazın açu kiräklege turındağı kisätüen qabatladı, yuğıysä neft çıqanaqlarına häm êlektr stansiyälärenä höcümnär yasalırğa mömkin.
"Zur alğarış buldı, läkin nindider säbäp arqasında tizdän kileşügä ireşelmäsä, bu, möğayen, bulaçaq, häm ägär Ormuz buğazı şunda uk 'Säwdä öçen açıq' bulmasa, bez İrandağı 'yaxşı' buluıbıznı barlıq êlektr stansiyälären, neft çıqanaqların häm Xarg utrawın şartlatıp häm tulısınça yuk itep tämamlayaçaqbız", - dip yazdı düşämbe könne Tramp sotsial' mediada.
Tramp, şulay uq, İrannı çista su belän täêmin itüçe tozsızlandıru zavodlarına höcüm itü belän yanadı.
Uzğan atnada AQŞ ilbaşı İrannıñ ênergetika qorılmalarına höcümnärne 10 köngä, 6nçı aprelgä qadar tuqtataçağın äytte.
Tramp AQŞ häm İran arasındağı söyläşülärdä alğarış bar dip äytsä dä, ul töbäkkä tağın da kübräq AQŞ ğaskärlären cibärüen däwam itä. Bu xäl İran parlamentı spikerınıñ Vaşingtonnı söyläşülär mömkinlege turında xäbärlär cibärü belän ber ük waqıtta cir öste operatsiyäsen planlaştıruda gäyepläwenä kiterde.
İran citäkçeläre AQŞ belän turıdan-turı söyläşülär alıp baruların kire qaqtı.