“Suğışqa - yuq”: İspaniyä xökümäte räise AQŞqa "suqır qollıqnı" kire qağa
Pedro Sançes, İspaniyäneñ "üç aludan qurqıp", "dönya öçen naçar" ğamällärdä qatnaşuçı bulmayaçağın assızıqlap, Ğıyraq suğışı sabaqların xäterlätä.
İspaniyä xökümät räise Pedro Sançes çärşämbe könne Yaqın Könçığıştağı xärbi êskalatsiyälärgä "suqır häm buysınuçan" quşılunı qatğıy räweştä kire qaqtı, İzrail, AQŞ häm İran arasında tiz arada ut tuqtatunı taläp itte.
AQŞnıñ “X” sotsial' mediä platformasında urnaştırılğan video yazmasında Sançes İspaniyäneñ pozitsiyäsen "suğışqa — yuq" dip iğlan itte.
2003 yılğı Ğıyraqqa bärep kerügä turıdan-turı parallel' yasap, Sançes 2003 yılğı Azor sammitına sıltama belän "Azor utrawları mentalititı" turında kisätte — anda AQŞ ilbaşı Djordj Buş, Angliya xökümäte räise Toni Blêr häm İspaniyä xökümäte räise Xose Maria Aznar, diplomatiyädän baş tartıp, Ğıyraqqa bärep kerü aldınnan Saddam Xösäyengä soñğı ultimatumnı quyğan — bu, anıñ süzlärençä, Awrupağa "iminiyätsez dönya" häm "naçarraq tormış" kitergän.
Ul İspaniyäneñ barı tik "üç aludan qurqu" arqasında ğına dönya öçen "naçar" ğamällärdä "qatnaşuçısı" bulmayaçağın äytte.
Sançes, şulay uq, İspaniyä armiyäseneñ töbäktäge grajdannar öçen "êvakuatsiyä mexanizmnarın" koordinatsiyäläw öçen "kön-tön" êşläwen rasladı.
Ul üz çıqışın bolay dip tämamladı: "Bez ilebezneñ iqtisadi, institutsional' häm äxlaqıy köçenä tulısınça ışanabız, häm mondıy mizgellärdä bez ispan buluıbız belän, êlekkegä qaraganda da, nığraq ğorurlanabız".
AQŞ häm İspaniyä arasındağı kiyerenkelek yuğarı. Madrid İranğa höcümnärne ğayepläde häm Vaşingtonğa İspaniyädäge xärbi bazalarnı İranğa qarşı höcümnär öçen qullanırğa röxsät itmäde.
Êlegräk İspaniyä tışqı êşlär ministrı Xose Manuêl Albares bazağa kerü belän bäyle kiyerenkeleklärdän soñ İspaniyäneñ AQŞ belän xärbi xezmättäşlekkä rizalaşuın "qatğiy räweştä" kire qaqtı.
“Cadena SER” radiosına söylägändä Albares Aq Yortnıñ däğwaların kire qaqtı, "Yaqın Könçığıştağı suğış häm İranğa qarşı höcümnär İspaniyä xökümäteneñ bezneñ bazalarnı qullanu turındağı pozitsiyäseneñ ber genä öteren dä üzgärtmäde" dip assızıqladı.
Bu kire qağu Aq Yort wäkile Karolin Levittnıñ İspaniyäneñ xezmättäşlekkä rizalaşuı turındağı belderülärennän soñ buldı. Levitt kileşügä AQŞ ilbaşı Donald Tramp üzeneñ Awrupadağı berlektäşe belän "barlıq säwdäne özü" belän yanagannan soñ ireşelgän dip belderde. Trampıñ ultimatumı Madrid AQŞqa İspaniyä cirendäge bazalarnı İranğa qarşı höcümnär başlaw öçen qullanunı tıyudan soñ kilde.
Levitt jurnalistlarğa bolay dide: "İspaniyägä kilgändä, alar kiçä ilbaşınıñ süzlären açıq häm tögäl işetkändär dip uylıym, häm min añlağança... alar AQŞ xärbiläre belän xezmättäşlek itärgä kileşte, şuña kürü min AQŞ xärbiläreneñ İspaniyädäge xezmättäşläre belän koordinatsiä täêmin itüen beläm".