Meksikadağı su basuda ülüçelär sanı arta
Tropik dawıllardan 250 meñnän artıq keşe zıyan kürde, 50 meñnän artıq öygä zarar kilgän
Meksikada köçle yañğırlar näticäsendä barlıqqa kilgän zur su basularda ülüçelär sanı 64kä citte, 65 keşe yuğaldı dip xäbär itte räsmi zatlar düşämbe könne.
Meksikanıñ Milli grajdanlılarnı saqlaw koordinaŝiyase belderüenä kürä uzğan atnadan birle “Prisŝilla” häm “Reymond” tropik dawılları kitergän köçle yañğırlar arqasında ülüçelär sanı arttı.
Milli grajdanlılarnı saqlaw koordinaŝiyase xäbär itkänçä zur zıyan kürgän vilayätlär arasında Verakruz, Puebla, Hidalgo, Kveretaro häm San Luis Potosi bar. Bu töbäklärdä 64 keşe ülgän, 65 keşe yuğalğan dip isäplänä.
Däwlät başlığı Milli saraydağı könlek matbuğat oçraşuında afät töbäklärendä xalıqqa yärdäm kürsätü öçen ğädättän tış xäl xezmätkärläreneñ tulısınça mobilizaŝiyalänüen belderde.
İlbaşı zıyan kürgän urınnarğa östämä törkemnär cibärelüen, alarnıñ kiyem-salım, gigiyena äyberläre, eçär su häm azıq-tölek kebek kiräk-yaraqlarnı tiz räweştä citkeräçägen äytte.
“Bez bu faciğadän zıyan kürgännärgä yärdäm itü häm torğızu êşlärenä böten küñelebezne biräçäkbez,” - dip belderde ul.
Meksika matbuğatı xäbär itkänçä bu - soñğı yıllarda kürelgän iñ zur su basu faciğalärennän berse. Afättä 250 meñnän artıq keşe zıyan kürde.
Su basularda 50 meñnän artıq öygä zarar kilgän.