İzrail Trampnıñ Gazzä komissiyäse sostavına qarşı çıqtı
Netanyaxunıñ ofisınnan yasalğan belderüdä älege şuranıñ êşçänlege İzrail belän kileşterelmäwe häm İzrail alıp barğan säyäsätkä qarşı kilüe belderelde.
İzrail AQŞ ilbaşı Donald Trampnıñ "Tınıçlıq şurası" (Board of Peace) qısalarında eşläyäçäk häm qamaw astındağı Fälästin cirlärendä suğıştan soñğı idaräne küzätäçäk Ğazzä komissiyäseneñ sostavına qarşı çıquın belderde.
Şimbä köne Binyamin Netanyaxunıñ ofisınnan yasalğan belderüdä mondıy süzlär urın aldı: "Tınıçlıq şurasına bäyle Ğazzä başqarma komissiyäseneñ sostavı turındağı iğlan İzrail belän kileşterelmäde häm bezneñ säyäsätkä qarşı kilä." Belderüdä Netanyaxunıñ bu mäsäläne turıdan-turı AQŞ däwlät särqätibenä citkerü öçen tışqı êşlär ministrına kürsätmä birüe äytelde. Monnan tış, belderüdä Netanyahunıñ bu temanı qatı tänqıytläwe assızqılandı.
Aq Yort tarafınnan comğa köne iğlan itelgän häm "Ğazzä başqarma komissiyäse" bularaq bilgele bu komissiyädä Törkiyä cömhüriyäte tışqı êşlär ministrı Xaqan Fidan häm Qatar räsmieneñ dä urın aluı iğtibarnı cälep itte.
Tınıçlıq şurası şimbä köne Misır, Törkiyä, Argentina häm Kanada liderlarınıñ qatnaşuı öçen yasalğan çaqırulardan soñ formalaşa başladı. Tramp ike yıl buyı däwam itkän İzrail bombalawları häm genotsidqa barıp citkän suğış säbäple zur öleşe xaräbägä äylängän Fälästin cirlärendä iqtisadi üseşkä yünältelgän bäxäsle küzallawın täqdim itkändä üzen bu şuranıñ başlığı dip iğlan itkän ide.
Bu täräqqıyätlär Tınıçlıq şurası küzätüe astında Ğazzäne idarä itü öçen bilgelängän fälästinle texnokratlar komitetınıñ Kuşner qatnaşında Qahirädä ütkärelgän berençe cıyılışınnan soñ buldı.
Fälästinle komitet äğzaları iğlan itelde
Ğazzä İdaräse Milli Komitetı başlığı Ali Şaat şimbä könne komitet äğzalarınıñ isemnären räsmi räweştä iğlan itte. Şaat êşlärneñ berençe êtapta Qahirädän alıp barılaçağın, annarı aşığıç gumanitar yärdäm planın tormışqa aşıru öçen Ğazzägä küçäçäklären äytte.
Misır däwlät mediası “Al-Qahera News”qa intervyusında injener, fännär dokторы, akademik Şaat üzeneñ komitet räise bulaçağın belderde.
Komitet êçendäge wazıyfalar tübändägeçä bülende: iqtisad, säwdä häm sänäğat öçen Ayäd Äbu Ramazan cawaplı, awıl xucalığı öçen Ğabdel Kärim Aşur, sälamätlek saqlawda - Ayäd Yagi, toraq häm cir - Usama äl-Sädavi, yustitsiyä - Adnan Äbu Varda, êşke êşlär häm qurqınıçsızlıq - general-mayor Sami Nasman, munisipalitetlar häm su êşläre - Ali Barxum, finans - Bäşir äl-Räis, sotsial êşlär - Xanaa Tärzi, mäğarif - Cabr äl-Daur, telekommunikatsiyälär - Omar äl-Şamali.
"Qahirädän xalqıbızğa xezmät itü häm Ğazzä xalqı duçar bulğan tarixi ğadelsezlekne ciñeläytü maqsatı belän tözelgän bu komitetnı iğlan itäbez," dide Şaat. Ul şuranıñ gumanitar ğazaplarnı kimetüne häm fälästinlelärneñ yäşäw şartların yaxşırtunı maqsat itep quyuın assızıqladı.
Şaat, monnan tış, Ğazzägä yärdämnäre öçen Misırğa häm ilbaşı Abdulfättah äs-Sisiğa, Qatar häm Törkiyäne dä kertep, aradaşçı illärgä häm komitet êşenä bulışuçı Ğäräp häm başqa däwlätlärgä räxmät äytte.